Memleket basshysy Qazaqstan halqyn Jańa jylmen quttyqtady
Qymbatty otandastar!
Sizderdi Jańa jyl merekesimen shyn júrekten quttyqtaımyn!
Búgin bárimiz júz jyldyqtyń shırek ǵasyrlyq belesine qadam basqaly turmyz.
Bıyl Altaı men Atyraý arasyndaǵy barsha jurt tarıhtyń jańa paraǵyn bir mezette ashady.
Halqymyz eki jyldyń toǵysar tusyn izgi nıetpen, erekshe kóńil kúımen kútedi. Ótken kúnderdi saralap, eski jylǵa baǵa beredi. Arman-maqsatyn aıqyndap, bolashaqqa zor úmitpen qaraıdy.
Bul – naǵyz otbasylyq mereke. Sondyqtan, men barshańyzǵa, eń aldymen, elimiz aman, jurtymyz tynysh, baýyrymyz bútin bolsyn degim keledi.
Ulý jyly ultymyz úshin mańyzdy oqıǵalarǵa toly boldy.
Túrli saladaǵy reformalar jemisin bere bastady.
Ekonomıkanyń jańa baǵdaryn belgilep, naqty sharalardy qolǵa aldyq. Óńdeý ónerkásibi qarqyndy damyp keledi. Birqatar iri óndiris orny ashyldy. Investıtsııalyq ahýal jaqsardy.
Myńdaǵan shaqyrym jol salynyp, jóndeldi. Elimizdegi eń uzyn kópirdiń qurylysy aıaqtalyp, halyq ıgiligine berildi.
Dıqandarymyz mol astyq jınap, qambany dánge toltyrdy.
«Taza Qazaqstan» aktsııasynyń aıasynda qalalar men aýyldar jańasha kelbetke ıe bola bastady.
Alǵash ret azamattarymyzdyń ortasha ómir súrý uzaqtyǵy 75 jasqa jetti.
Óskeleń urpaqtyń jarqyn bolashaǵy úshin aýqymdy jumys atqarylyp jatyr.
Ulttyq qordaǵy qarjynyń bir bóligi balalardyń esepshotyna tústi.
Júzden astam jańa mektep ashyldy. Kóptegen áleýmettik nysan salyndy.
Parlament depýtattary qoǵamdaǵy ózekti máseleler boıynsha zańdar qabyldady.
Sondaı-aq, bıyl biz elimizdiń keleshegine aıryqsha áser etetin óte mańyzdy sheshim qabyldadyq. Atom elektr stantsııasyna qatysty referendým ótkizdik. Kópshilik bul bastamaǵa qoldaý bildirdi.
Qazaqstannyń álemdik arenadaǵy abyroıy arta tústi.
Astanada bedeldi halyqaralyq uıymdardyń mańyzdy sammıtteri ótti.
Dúnıejúzilik kóshpendiler oıyndaryna myńdaǵan sportshylar men meımandar keldi. Baıraqty básekeni tabysty uıymdastyryp, tól órkenıetimizdi jer júzine tanyttyq.
Sportshylarymyz Olımpıada jáne Paralımpıada oıyndarynda Kók týymyzdy bıikte jelbiretti.
Oqýshylarymyz túrli bilim saıystarynan júldeli oraldy.
Basqa da kóptegen tabys bar.
Bıyl kóktemde birqatar aımaqta alapat tasqyn bolǵanyn bilesizder. Tabıǵattyń tosyn synaǵy bárimizge aýyr tıgeni sózsiz. Soǵan qaramastan, qıyn kúnderde halqymyz bir-birine janashyr bolyp, myzǵymas birligin kórsetti.
Zardap shekken barsha azamatqa jan-jaqty kómek berildi. Memleket eshkimdi nazardan tys qaldyrǵan joq. Barlyq mindettemesin tolyq oryndady.
Júzdegen otbasy Jańa jyldy jańa shańyraqta qarsy alyp jatyr.
Biz osylaısha yrysty yntymaǵymyzdyń arqasynda barlyq qıyndyqty eńseremiz.
Alǵa senimmen qadam basamyz.
Júıeli reformalar odan ári jalǵasady.
Josparymyzdyń bári oıdaǵydaı oryndalady.
Aldaǵy jyl budan da tabysty bolady.
Men Prezıdent retinde buǵan bar kúsh-jigerimdi salamyn.
Úkimet ekonomıkamyzdyń údemeli ósýin qamtamasyz etip, tıimdi jumys atqarýy kerek.
Jańa óndiris oryndaryn ashyp, kásip júrgizýge jaǵdaıdy jaqsartý qajet.
Joldar salýdy jáne kommýnaldyq máselelerdi sheshýdi jalǵastyrý kerek.
Tsıfrlyq tehnologııalardy, sonyń ishinde jasandy ıntellekti qoldaný aıasyn keńeıtý qajet.
Dıqandarymyzǵa qoldaýdy kúsheıtý kerek.
Osy jumystardyń barlyǵynda basty maqsat - azamattardyń ál-aýqatyn arttyrý.
Memleket bilim berý, densaýlyq saqtaý, ǵylym men mádenıetti damytýǵa kóbirek kóńil bóletin bolady.
Jańa mektepter men aýrýhanalar salýdy, muǵalimderdiń, dárigerlerdiń, ǵalymdar men mádenıet qaıratkerleriniń mártebesin kóterýdi jalǵastyramyz.
Árıne, memleket jastarǵa qoldaý kórsetedi.
Keler jyly bizdi birqatar ataýly data kútip tur.
Uly Jeńistiń 80 jyldyǵyna laıyqty etip ótkizemiz. Konstıtýtsııa men Qazaqstan halqy Assambleıasynyń otyz jyldyǵyn joǵary deńgeıde atap ótemiz.
Sondaı-aq, uly Abaıdyń 180 jyldyq mereıtoıyn laıyqty atap ótýimiz kerek.
Men aldaǵy jyldy «Jumysshy mamandyqtar jyly» dep jarııaladym. Bul – eńbek adamdaryna degen erekshe qurmettiń belgisi.
Biz otanshyldyq, eńbekqorlyq jáne biliktilikke aıryqsha mán beremiz.
Dál qazir merekege qaramastan, myńdaǵan otandasymyz jumys istep jatyr. Olardyń arasynda shekarashylar, dárigerler, tártip saqshylary, qutqarýshylar men órt sóndirýshiler, óndiris basyndaǵy mamandar jáne basqa da azamattar bar. Muny óz isine degen adaldyqtyń naǵyz úlgisi deýge bolady.
Men búkil halqymyzdyń atynan Sizderge shynaıy rızashylyǵymdy bildiremin.
Shetelde bilim alyp jatqan nemese jumys istep júrgen azamattarymyzǵa amandyq tileımin!
Qadirli aǵaıyn!
Osy merekelik sátte men ár shańyraqqa shattyq tileımin!
Jańa jyl ár azamatqa jaqsylyq ákelsin!
Tórt qubylamyz túgel bolsyn!
Ardaqty analarymyz ben ardagerlerimiz aman bolsyn!
Jas urpaqtyń joly ashyq, bolashaǵy jarqyn bolsyn!
Qasterli Otanymyz ósip-órkendeı bersin!
Jańa jylda barshańyzǵa amandyq, baq-bereke tileımin!
Osy otbasylyq mereke júrekterińizdi jylýlyq pen qýanyshqa toltyrsyn!
Sizge shyn júrekten zor densaýlyq, baqyt jáne órkendeý tileımin!
Jańa jyl qutty bolsyn!
Buǵan deıin habarlaǵanymyzdaı, Prezıdenttiń quttyqtaýy Jibek Joly telearnasynyń efırinen kórsetildi.