Memleket basshysy: Qazaqstan Eýropa odaǵyna qajet munaıdyń shamamen 10% qamtamasyz etedi

<p>RIM. KAZINFORM &ndash; Prezıdent Qasym-Jomart Toqaev ıtalııalyq kásipkerlerge el ekonomıkasyna shetelden tikeleı tartylatyn ınvestıtsııa kólemin ulǵaıtý maqsatynda praktıkalyq jáne zańnamalyq turǵyda josparlanǵan sharalar týraly málimet berdi. Bul týraly Aqordanyń baspasóz qyzmetinen málim etti.</p>

«Biz ınvestorlarǵa ońtaıly ári yńǵaıly orta qalyptastyrý úshin bızneske qoıylatyn artyq talaptardy anyqtap, olardy joıdyq. Jaqynda Investıtsııalardy tartý jónindegi keńes qurylyp, oǵan keń aýqymdy ókilettik berildi. Bul Keńestiń jedel sheshim qabyldaýyna, kórsetiletin jan-jaqty memlekettik qoldaýdy qamtamasyz etý arqyly ınvestıtsııalyq jobalardy júzege asyrýyna yqpal etedi», – dedi QR Prezıdentá Italııaǵa resmı sapary aıasynda ótken «Qazaqstan-Italııa» ınvestıtsııalyq dóńgelek ústeli barysynda.

Qasym-Jomart Toqaevtyń pikirinshe, energetıka salasy – eki el arasyndaǵy ekonomıkalyq yntymaqtastyqtyń negizgi baǵyty.

«Qazaqstan munaıynyń 80 paıyzdan astamy Eýropaǵa eksporttalady. Bul Eýropa Odaǵyna qajet munaıdyń shamamen 10 paıyzyn qamtamasyz etedi. Qazaqstannyń uzaq jyldan bergi jáne senimdi energetıkalyq seriktesi Italııaǵa alǵys aıtqym keledi. Biz ıtalııalyq ENI kompanııasynyń Qazaqstan ekonomıkasyna qosqan úlesin joǵary baǵalaımyz. Qazaqstan munaı men gazdy barlaý salasynda mol múmkindik usynyp otyr. Biz mańyzdy ken oryndaryn ashý maqsatynda álemdik ozyq tájirıbeni engizip jatyrmyz. Sondaı-aq Italııa kompanııalaryn munaı-gaz salasynda servıstik qyzmet kórsetý isine atsalysýǵa shaqyramyz», – dedi Memleket basshysy.