Memleket basshysy «KamLitKZ» JShS shoıyn quıý zaýytyna bardy
Prezıdent júk kólikterine arnalǵan qosalqy bólshekter shyǵaratyn óndiris ornyn aralap kórdi. Seriktestiktiń bas dırektory Dmıtrıı Gýrtovoı zaýytta jylyna 45 myń tonna shoıyn quımasy óndiriletinin aıtty. Quny 78,2 mıllıard teńge bolatyn jobany iske asyrý nátıjesinde 500 jumys orny ashyldy.
Memleket basshysyna jobaǵa Qazaqstannyń ınjenerleri men tehnologtary atsalysyp jatqany baıandaldy. Sonymen qatar álemdik deńgeıdegi tájirıbeli ınjınırıng kompanııalarynyń sarapshylary men eýropalyq mashına jasaýshylar tartylǵan.
Qasym-Jomart Toqaevqa shoıyn qorytý jáne qalypqa quıý, sondaı-aq buıymdy óńdeý sekildi jumystardyń tolyq protsesi kórsetildi.
Zaýyt barlyq zamanaýı talapqa saı keledi. Avtomattandyrý jáne energııalyq tıimdilik deńgeıi joǵary bolǵandyqtan, qorshaǵan ortaǵa áseri az. Qazirgi ýaqytta munda 30 robot bar. Olar anaǵurlym kúrdeli ári aýyr tehnologııalyq operatsııalardy oryndaıdy.
Budan soń zaýytta eńbek etetin otandyq jas ınjenerlermen áńgimelesti.
– Búginde biz jumysshy mamandardy qoldap jatyrmyz. Ol jóninde Joldaýymda da aıttym. Kelesi jyldy Jumysshy mamandyqtary jyly dep jarııaladyq. Eńbek – qashan da qundy. Bul jerde kil jastar jumys isteıdi eken. Biz iri jáne shaǵyn kásiporyndarda qyzmet etetin mamandardy, ásirese jastardy mindetti túrde qoldaımyz. Elimizde eńbek ótili 100, 200 jyldy quraıtyn, tipti odan da asatyn jumysshylar áýleti bar. Sondyqtan biz osyndaı otbasylarǵa, áýletterge qurmet kórsetemiz. Sizder sekildi jastardyń ómir joly endi bastalyp jatyr. Elimizdiń damýyna zor úles qosatyndaryńyzǵa senimdimin. Barshańyzǵa sáttilik tileımin, – dedi Qasym-Jomart Toqaev.
Prezıdent jańa óndirilgen tsılındrlar blogyna qoltańba qaldyryp, joba qatysýshylaryna Qazaqstannyń mashına jasaý klasterin damytýǵa úles qosqany úshin alǵys aıtty.
Sonymen qatar Memleket basshysyna Qostanaı oblysynyń ákimi Qumar Aqsaqalov óńirge ınvestıtsııa tartý jóninde málimet berdi. Atap aıtqanda, ındýstrııalyq sektordaǵy, agroónerkásip keshenindegi, metallýrgııa, mashına jasaý jáne logıstıka salalaryndaǵy jańa jobalar týraly baıandady.
Qumar Aqsaqalovtyń aıtýynsha, jospar iske asyrylǵan kezde, jalpy óńirlik ónim kólemi 2 ese ósip, jyl saıynǵy bıýdjet túsimi 75 mıllıard teńgege ulǵaıady. Sondaı-aq ortasha jalaqy mólsheri 1,5 ese artyp, 20 myńǵa jýyq jańa jumys orny ashylady.