Memleket basshysy Gýrbangýly Berdimuhamedovpen kezdesti
Qazaqstan Prezıdenti Túrikmenstan Halk Maslahatynyń tóraǵasymen búgingi kezdesýi baýyrlas eki el men onyń halyqtary arasyndaǵy ózara seriktestiktiń odan ári nyǵaıýyna yqpal etetinin atap ótti.
Memleket basshysynyń aıtýynsha, qazaq-túrikmen qarym-qatynasy tabysty damýda jáne strategııalyq áriptestiktiń deńgeıine tolyq saı keledi.
– Qazaqstanda Sizdi Túrikmenstannyń kóshbasshysy, zamanymyzdyń kórnekti memleket qaıratkeri retinde tanıdy. Siz Qazaqstan men Túrikmenstan arasyndaǵy yntymaqtastyqtyń damýyna zor úles qostyńyz. Sondyqtan Sizdiń osy jıynǵa kelýińizdiń jáne búgingi kezdesýimizdiń saıası máni zor dep sanaımyn. Eki eldiń yntymaqtastyǵyn odan ári nyǵaıtý turǵysynan pysyqtaıtyn ortaq isterimiz bar. Biz – baýyrlas ári kórshiles eldermiz. Qazaqstan men Túrikmenstan arasynda eshqandaı túıtkil joq. Eki el bir-birine qashanda tileýles, – dedi Memleket basshysy.
Gýrbangýly Berdimuhamedov Túrki memleketteri uıymynyń mereıtoılyq sammıtine qatysýǵa shaqyrǵany úshin Qasym-Jomart Toqaevqa alǵys aıtyp, eki eldiń yntymaqtastyǵyn joǵary baǵalady.
– Biz osy jyldar ishinde syrtqy saıasat, saýda-ekonomıkalyq jáne mádenı-gýmanıtarlyq baılanystarymyz boıynsha quqyqtyq baza qalyptastyrdyq. Syrtqy saıası máselede Sizge alǵysymyz sheksiz. Siz bizdiń beıtarap ustanymymyzdy árdaıym qoldap kelesiz. Budan bólek Birikken Ulttar Uıymy qurylymynda basshylyq qyzmet isteı júrip, bizdiń syrtqy saıası baǵdarymyz úshin kóp jumys atqardyńyz. Sol úshin Sizge alǵysymyz sheksiz, – dedi Túrikmenstan Halk Maslahatynyń tóraǵasy.
Taraptar ózara saýda-sattyqta oń dınamıka bar ekenin atap ótip, energetıka, ónerkásip, kólik, logıstıka jáne basqa da salalardaǵy jobalardyń júzege asyrylý barysyn talqylady.
Sonymen qatar kezdesý barysynda Qasym-Jomart Toqaev pen Gýrbangýly Berdimuhamedov mádenı-gýmanıtarlyq baılanystardy odan ári nyǵaıtýǵa daıyn ekenin rastady.