Memleket basshysy energııa kózderin paıdalanýdy qoldaýǵa baǵyttalǵan zańǵa qol qoıdy

<p>ASTANA. KAZINFORM &ndash;&nbsp;Memleket basshysy &laquo;Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý jáne elektr energetıkasy máseleleri boıynsha ózgerister men tolyqtyrýlar engizý týraly&raquo; Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.</p>

Zań energetıka salasyn qoldaý jáne damytý tetikterin odan ári jetildirýge baǵyttalǵan.

Atap aıtqanda, jańartylatyn energetıka salasynda shaǵyn generatsııany damytý úshin «jańartylatyn energııa kózderin paıdalaný jónindegi shaǵyn masshtabty obekt» (budan ári – shaǵyn masshtabty JEK) uǵymy engizildi. Mundaı tıptegi obektilerdiń sanatyna qýaty 200 kılovattan aspaıtyn, jańartylatyn energııa kózderin paıdalana otyryp elektr jáne/nemese jylý energııasyn óndiretin tehnıkalyq qurylǵylar jatady.

Shaǵyn masshtabty JEK ıeleri osyndaı obektiler óndirgen elektr energııasyn jáne/nemese jylý energııasyn óz qajettilikterine qazirgideı paıdalana beredi jáne artyq elektr qýatyn energııamen jabdyqtaýshy uıymǵa sata alady. Al atalǵan uıym ony Ulttyq ekonomıka mınıstrliginiń Tabıǵı monopolııalardy retteý komıteti belgileıtin shekti baǵamen satyp alady.

Elimizdiń gıdroenergetıkalyq áleýetin arttyrý maqsatynda 2023 jylǵy 1 shildege deıin paıdalanýǵa berilgen, jıyntyq qýaty 10 megavattan aspaıtyn shaǵyn gıdroelektr stantsııalarynyń (budan ári – ShGES) óndirgen elektr energııasyn jabdyqtaýshy uıymdarǵa tikeleı, ıaǵnı biryńǵaı satyp alýshynyń qyzmetine júginbeı ótkizýge ruqsat etiledi.

ShGES óndirgen elektr qýatyn energııamen jabdyqtaýshy uıymdar Energetıka mınıstrligi belgilegen shekti tarıf boıynsha basym tártippen satyp alady. Tarıf ár jeti jyl saıyn qaıta bekitilip otyrady.

Sonymen qatar Zańda otynnyń balamaly túri retinde gazdy paıdalana otyryp, energııa óndiretin qondyrǵylar salý arqyly burynǵy elektr stantsııalaryn jańǵyrtýǵa, rekonstrýktsııalaýǵa jáne/nemese keńeıtýge arnalǵan ınvestıtsııalyq kelisimder jasaý sharttary túzetildi.

Budan bólek, kommýnaldyq menshiktegi óńirlik elektr jelilik kompanııalarǵa elektr jelilerin salýǵa, rekonstrýktsııalaýǵa jáne jańǵyrtýǵa bıýdjet esebinen kredıt berý tártibi engiziledi.

Kredıt berý qaǵıdalaryn Energetıka mınıstrligi Qarjy mınıstrligimen kelise otyryp bekitedi.

Zańnyń mátini baspasózde jarııalanady.