Memleket basshysy: Energetıka salasyna qosymsha serpin berý úshin tıisti ınvestıtsııa salamyz

<p>Damý jáne shet elden ınvestıtsııa tartý Qazaqstannyń basty basymdyqtary bolyp tabylady. Bul týraly Memleket basshysy Qasym-Jomart Toqaev jýyrda Euronews telearnasyna bergen suhbatynda aıtty, dep habarlaıdy&nbsp;<a href="https://kaz.inform.kz/" target="_blank" rel="noopener">Kazinform.</a></p>

«Qazaqstan damýynyń jáne ınvestıtsııalardyń aldaǵy baǵyty qandaı?», - dep surady telearna tilshisi QR Prezıdentinen.

Toqaev Qazaqstan jan basyna shaqqanda sheteldik ınvestıtsııany tartý boıynsha Ortalyq Azııada, tipti odan tys sheńberde birinshi orynda turǵanyn jáne halyqaralyq ınstıtýttar Qazaqstannyń halyqaralyq reıtıngin kótergenin atap ótti.

Prezıdent energetıka salasynyń asa mańyzdy ekenin aıta kele, Qazaqstan onymen bir mezgilde tótenshe mańyzdy materıaldar ázirleýge úmit artyp otyrǵanyn jetkizdi.

«Osy turǵyda Eýropalyq odaqpen keleshektegi yntymaqtastyǵymyzǵa úmit artamyz. Osy asa názik jáne strategııalyq mańyzdy salada jaqsy seriktes bolýǵa daıynbyz. Bul da bizdiń basymdyqtarymyzdyń biri», - dep atap ótken Q.Toqaev, Qazaqstanǵa bul salada halyqaralyq yntymaqtastyq jáne kóbirek ınvestıtsııa qajet ekenin qosyp ótti.

Memleket basshysy Qazaqstan men Eýropalyq odaq dál osy tótenshe mańyzdy materıaldar salasynda jaqsy seriktes bolyp, úlken jetistikke jetetinine senim bildirdi.

Budan ári QR Prezıdenti energetıkalyq bıznes el ekonomıkasynyń negizgi tirekteriniń biri ekenin basa aıtty.

«Qazaqstan energetıkalyq resýrstarǵa óte baı jáne mundaı ekonomıkalyq damýdan bas tartýdyń qajeti joq. Árıne, biz eldiń energetıka salasyna qosymsha serpin berý úshin tıisti ınvestıtsııalardy salamyz», - dedi Toqaev.

Sonymen birge Qazaqstan basshysy 2060 jyldyń sońyna deıin kómirtegi beıtaraptyǵyna tolyq qol jetkizý týraly eldiń órshil maqsaty týraly eske saldy.

Qasym-Jomart Toqaevtyń pikirinshe, ol úshin qazaqstandyqtar óz oılaryn túbegeıli ózgertýi kerek.

«Bul búkil álemde ekonomıkalyq damýdyń jalpy úrdisi ekenin moıyndaımyn jáne Qazaqstan odan qalys qalmaıdy. Onymen bir mezgilde biz qorshaǵan ortany qorǵaýǵa asa mán beremiz. Iá, Qazaqstan burynǵydaı energetıkalyq balansy kómirge táýeldi el bolyp qalyp otyr. Biraq aldaǵy bolashaqta jaǵdaı aıtarlyqtaı ońynan ózgeredi dep oılaımyn», - dedi ol.