Memleket basshysy veıpke tyıym salatyn zańǵa qol qoıdy

<p>ASTANA. KAZINFORM &mdash; Memleket basshysy &laquo;Qazaqstan Respýblıkasynyń keıbir zańnamalyq aktilerine densaýlyq saqtaý máseleleri boıynsha ózgerister men tolyqtyrýlar engizý týraly&raquo; Qazaqstan Respýblıkasynyń Zańyna qol qoıdy.</p>

Zań medıtsına qyzmetkerlerin quqyqtyq jáne qarjylyq turǵydan qorǵaý júıesin engizýge jáne olardyń jaýapkershiligin arttyrýǵa, sondaı-aq jastar arasynda quramynda nıkotıni bar zattardyń taralýynyń aldyn alý jáne oǵan qarsy kúresý úshin júıeli sharalar qabyldaýǵa baǵyttalǵan.

Zań arqyly medıtsına qyzmetkerleriniń kásibı jaýapkershiligin saqtandyrý tetigi engizildi (Zań resmı jarııalanǵannan keıin 6 aı ótken soń qoldanysqa enedi).

Sonymen qatar medıtsına qyzmetkerlerin qoldaýǵa baǵyttalǵan túzetýler qabyldandy. Atap aıtqanda:

turǵylyqty jeri boıynsha mektepke deıingi uıymdardan balalary úshin basym tártippen oryn alý, kásibı qyzmetine zańsyz aralasýdan jáne kedergi keltirýden qorǵaý, mamandyǵyna qurmetpen qaraý, medıtsınalyq mamandyǵy boıynsha áskerı qyzmetin ótkerý nemese áskerı qyzmetke shaqyrýdy keıinge qaldyrý quqyqtary berildi;

«Qazaqstannyń eńbek sińirgen dárigeri» qurmetti ataǵy – memlekettik nagradasy belgilendi;

basy artyq esep nemese aqparat berýden bosatý úshin densaýlyq saqtaý salasyndaǵy ýákiletti organ budan bylaı medıtsına qyzmetkerleri toltyrýǵa mindetti qujattama tizbesin bekitedi;

asa tapshy mamandyqty meńgergen medıtsına qyzmetkerleri aýyldyq jerge keminde 5 jyl jumys isteýge kelgen jaǵdaıda, oǵan eń tómengi jalaqynyń 100 eselengen mólsherinde birrettik aqshalaı tólem beriledi. 

Budan bólek, Zańda shegýge kelmeıtin temeki ónimderin, veıpterdi, hosh ıistendirgishterdi jáne olarǵa arnalǵan suıyqtyqtardy satýǵa, taratýǵa, sondaı-aq olardy jarnamalaýǵa tyıym salý qarastyrylǵan (Bul norma resmı jarııalanǵannan keıin 60 kún ótken soń qoldanysqa engiziledi).

Zańnyń mátini baspasózde jarııalanady.