Memleket basshysy Beıjińde Ábý Nasyr Ál-Farabıge qoıylǵan bıýstti saltanatty túrde ashty
Ashylý rásimine QHR bilim mınıstriniń orynbasary Van Gýanıan, ýnıversıtettiń Partııa komıtetiniń hatshysy Nı Haıdýn, rektory Dýan Pen jáne Memleket basshysyna sabaq bergen ýnıversıtet professory Lıý Shıtsın, sondaı-aq QHR Memlekettik óner murajaıynyń dırektory, músin avtory Ý Veıshan qatysty.
Memleket basshysy, eń aldymen, Ál-Farabıdiń álemdik órkenıetke qosqan zor úlesine aıryqsha toqtaldy.
– Barshańyzǵa málim, Ál-Farabı – Shyǵystyń uly oıshyly, onyń álemdik órkenıettiń damýyna qosqan úlesi orasan zor. Ál-Farabı Qazaqstan aýmaǵynda týyp-ósti, bilim izdep kóptegen elge bardy. Matematıka, jaratylystaný, astronomııa, fılologııa jáne basqa da birqatar ilimdi damytýǵa zor eńbek sińirdi. Adamzattyń damýyna ólsheýsiz úles qosty. Ol fılosofııalyq týyndylarynda ádildik ıdeıasyna erekshe nazar aýdardy. Qaıyrymdy qoǵam jáne úılesimdi memleket qurý máselesine basa mán berdi. Adamgershilik pen rýhanı qundylyqtardy dáriptedi. Ǵalym mýzyka jáne kallıgrafııa ónerin zerdeledi, – dedi Prezıdent.
Qasym-Jomart Toqaev entsıklopedııalyq deńgeıdegi, ıaǵnı jan-jaqty bilimi bar Ál-Farabıdi zamandastary Arıstotelden keıingi «Ekinshi ustaz» dep ataǵanyna nazar aýdardy.Memleket basshysy ǵulama ǵalymnyń eńbekteri árdaıym ózekti, mán-maǵynasyn joǵaltpaıtynyn atap ótti.
– Onyń shyǵarmalary – álemdik aqyl-oıdyń altyn qoryna qosylǵan qundy qazyna. Ál-Farabıdiń 1150 jyldyǵy ıÝNESKO-nyń ataýly kúnderiniń jahandyq tizimine engizildi. Biz 2020 jyly osy mereıtoıdy erekshe atap óttik. Halyqaralyq ǵylymı sımpozıýmdar, konferentsııalar uıymdastyryldy. Monografııalar men jınaqtar basyp shyǵaryldy. Derekti fılmder túsirildi. Munyń bári Ál-Farabıdiń eńbekterin tereń túsinýge múmkindik beredi, onyń mol murasyn jan-jaqty nasıhattaýǵa jol ashady. Endi Qytaı ǵalymdary men jastaryna fılosof jaıly birqatar ǵylymı eńbekter qoljetimdi bolady. Osy qundy derektermen, eń aldymen, Beıjiń Til jáne mádenıet ýnıversıtetiniń oqytýshylary men stýdentteri tanysa alady. Bul – qýantarlyq jaıt. Men de kezinde osy oqý ornynda týra qyryq jyl buryn bilim aldym. Sondyqtan búgin Ábý Nasyr Ál-Farabıdiń músinin ashý – men úshin zor mártebe, – dedi Qasym-Jomart Toqaev.
Memleket basshysy uly oıshyldyń murasy bilim ordasynda jan-jaqty zertteletinine, sol arqyly mádenı baılanystarymyz nyǵaıa túsetinine senim bildirdi. Sonymen qatar osy bastamaǵa qoldaý bildirgen Qytaı Úkimetine, Beıjiń Til jáne mádenıet ýnıversıtetine, Qytaıdyń Memlekettik óner murajaıyna jáne kórnekti músinshi Ý Veıshanǵa zor rızashylyǵyn bildirdi.