Memleket basshysy Bas prokýror Berik Asylovty qabyldady
Bas prokýror ınvestıtsııalyq jobalardy qoldaý týraly baıandady. Berik Asylovtyń aıtýynsha, el ekonomıkasyna 8,3 trıllıon teńge qarjy quıǵan 445 ınvestorǵa quqyqtyq kómek kórsetilgen. «Prokýrorlyq súzgi» jobasy aıasynda memlekettik organdardyń ınvestorlarǵa qarsy 500 sheshimi bekitilgen joq. Qabyldanǵan sharalar ınvestorlardyń memlekettik bılik ınstıtýttaryna degen senimin arttyra túsýge múmkindik berdi.
Qasym-Jomart Toqaevqa aktıvterdi qaıtarý jumystary týraly baıandaldy. Bıyl prokýratýra organdary jalpy quny 262 mıllıard teńge, sonyń ishinde shetelden 205 mıllıon dollarǵa baǵalanǵan aktıvterdi qaıtarǵan. Aktıvterdi basqarý kompanııasyna kásiporyndardaǵy quny 82 mıllıard teńge bolatyn múlik pen úlester berildi. Jalpy somasy 450 mıllıard teńgege teń aktıvterdi qaıtarý týraly kelisim maquldandy.
Memleket basshysynyń Joldaýynda aıtylǵan zańsyz berilgen jáne paıdalanylmaı jatqan aýyl sharýashylyǵy alqaptaryn qaıtarý jónindegi tapsyrmasy oryndalyp jatyr. Bas prokýror sońǵy 4 jylda memleketke 17 mıllıon gektar jer qaıtarylyp, aınalymǵa engizilgenin jetkizdi. Jaıylym tapshylyǵy 29 mıllıon gektardan 8 mıllıon gektarǵa deıin, ıaǵnı 4 ese qysqardy, jerge úlesi bar 11 myń adamnyń quqyǵy qorǵaldy.
Budan bólek, Berik Asylov Qasym-Jomart Toqaevty atyshýly birqatar qylmystyq istiń tergelý barysynan habardar etti.
Sonymen qatar Memleket basshysyna esirtki qylmysyna qarsy kúrestiń jaı-kúıi jóninde aqparat berildi. Jyl basynan beri esirtki satýdyń 1573 faktisi anyqtaldy. Budan bólek 15 tonnadan astam esirtki tárkilengen, sonyń ishinde 1 tonna sıntetıkalyq esirtki bar. 60-qa jýyq esirtki zerthanasy joıylyp, 13 uıymdasqan qylmystyq toptyń áreketine tosqaýyl qoıyldy.
Memleket basshysy «Ádiletti Qazaqstan» tujyrymdamasynda aıqyndalǵan «Zań jáne Tártip» baǵdaryn nyǵaıtý isine prokýratýra organdarynyń kúsh-jigerin barynsha jumyldyrýdy, ásirese, zańǵa qaıshy kez kelgen áreket úshin jazadan jaltarýǵa jol bermeýdi tapsyrdy.