Memleket basshysy Astanadaǵy birqatar jańa mektepti aralap kórdi
Memleket basshysy Astana qalasynyń Esil aýdanyndaǵy №103 mektepke baryp, zamanaýı qurylǵylarmen jabdyqtalǵan oqý kabınetterin aralap kórdi.
Prezıdentke oqý-tárbıe jumystaryna qolaıly jaǵdaı jasaý jańa mektepterdiń basty ereksheligi ekeni aıtyldy. Bilim ordasynyń aýmaǵy men ǵımarat ishinde oqýshylardyń qaýipsizdigi tolyqtaı qamtamasyz etilgen. Ol úshin beınebaqylaý júıesi ornatylǵan. Bastaýysh jáne joǵary synyp oqýshylary jeke-jeke bloktarda bilim alady, erekshe qajettilikteri bar balalarǵa tıisti jaǵdaı jasalǵan.
Qazirgi kezde mekteptiń ishki árleý jumystary aıaqtalyp qaldy. Sonymen qatar jıhazdar men qural-jabdyqtar ornatylyp, abattandyrý jumystary júrgizilip jatyr.
Qasym-Jomart Toqaev Astana qalasynyń «Nura» aýdanyndaǵy №101 mektepti aralap kórdi. Atalǵan bilim ordasynda eki aýysymda 4 myń oqýshy jaratylystaný-matematıka jáne qoǵamdyq-gýmanıtarlyq baǵyttar boıynsha oqıtyn bolady.
Memleket basshysy mekteptiń oqý jáne shyǵarmashylyq kabınetterin, sondaı-aq sport jáne akt zaldaryn aralady.
Prezıdentke jańa mekteptiń múmkindikteri, atap aıtqanda, oqýshylardyń shyǵarmashylyq daǵdylaryn damytý, tsıfrlyq tehnologııalardy zertteý, jasandy ıntellektini qoldaný, «Oqýǵa qushtar mektep» jobasyn júzege asyrý, oqý baǵdarlamasy men robotty tehnıkany úılestirý baǵyttary jaıynda málimet berildi.
Astana qalasynyń ákimi Jeńis Qasymbek elordanyń orta bilim berý salasyn damytý týraly baıandady. Sondaı-aq ol «Jaıly mektep» ulttyq jobasy aıasynda qalada 24 oqý oshaǵy salynyp jatqanyn aıtty.
Al Oqý-aǵartý mınıstri Ǵanı Beısembaev jańa oqý jylyna daıyndyq jaıynda esep berdi. Búginde respýblıka boıynsha 536 myń oqýshyǵa arnalǵan 302 mekteptiń qurylysy júrip jatyr. Al 220 myń oqýshyny qamtıtyn 280 bilim berý mekemesi kúrdeli jóndeýden ótýde. Memleket basshysynyń tapsyrmasyna sáıkes 1,7 mıllıon bala tegin tamaqpen qamtylady.