Memleket basshysy Álıhan Smaıylovty qabyldady

<p>ASTANA. KAZINFORM - Memleket basshysy Joǵary aýdıtorlyq palata tóraǵasy Álıhan Smaıylovty qabyldady. Qasym-Jomart Toqaevqa Joǵary aýdıtorlyq palatanyń bıylǵy II toqsandaǵy jumysynyń qorytyndylary tanystyryldy, dep habarlaıdy Aqordanyń baspasóz qyzmeti.&nbsp;</p>

Atap aıtqanda, temirjolǵa basa nazar aýdara otyryp, kólik salasyna, sondaı-aq Abaı, Jetisý, Ulytaý, Almaty oblystarynyń bıýdjetterine jáne qazaqstandyqtardy dári-dármekpen qamtamasyz etý júıesine aýdıt júrgizilgen. Jalpy somasy 2,9 trıllıon teńgeden astam qarjyny quraıtyn 73 nysan tekserilgen. Nátıjesinde 39 mıllıard teńgeden astam qarajattyń zańsyz jumsalǵany anyqtalǵan.

Álıhan Smaıylovtyń aıtýynsha, kemshilikterdi joıý úshin kólik salasyn damytý, bıýdjettik-ınvestıtsııalyq jobalardy iske asyrý, otandyq farmatsevtıka ónimderin óndirýshilerdi memleket tarapynan qoldaý tetigin qaıta qaraý jóninde usynystar ázirlendi.

Prezıdentke memlekettik aýdıt júıesin reformalaý jónindegi usynystar toptamasy tanystyryldy.

Budan bólek, Memleket basshysyna bıyl ekinshi jartyjyldyqta júrgiziletin aýdıtorlyq is-sharalar týraly baıandaldy. Tekserý jumystary Nazarbaev Ýnıversıteti jáne «QazMunaıGaz» UK» AQ qyzmetin, sot júıesin, sondaı-aq aýyl sharýashylyǵyndaǵy, óńdeý ónerkásibindegi jáne qurylystaǵy jekelegen baǵyttardy qamtıdy.

Qasym-Jomart Toqaev bıýdjet qarajaty men memleket aktıvteriniń paıdalanylýyn múltiksiz baqylaýdy qamtamasyz etýdi tapsyrdy. Sondaı-aq jalpy memlekettik aýdıt júıesiniń tıimdiligin odan ári arttyrýǵa erekshe mán berý kerek ekenin aıtty.