Memleket basshysy AQSh senatory Stıv Deınsti qabyldady

<p>ASTANA. KAZINFORM - Prezıdent Qasym-Jomart Toqaev AQSh Senatynyń múshesi Stıv Deınske iltıpat bildire otyryp, Qazaqstan men Amerıkanyń yntymaqtastyǵy dástúrli túrde qarqyndy damyp kele jatqanyn atap ótti. Sonymen qatar ekijaqty qatynastarda parlamenttik dıplomatııa mańyzdy ról atqaratynyn aıtty.</p>

Kezdesý barysynda saýda-ekonomıkalyq yqpaldastyq máseleleri qarastyryldy. Qazaqstan Prezıdenti elimizde ınvestıtsııa tartý, ekonomıkany yryqtandyrý jáne ónerkásipti damytý isine erekshe nazar aýdarylyp otyrǵanyn málimdedi. Qasym-Jomart Toqaevtyń aıtýynsha, energetıka, paıdaly qazbalardy barlaý ári óńdeý, ınfraqurylymdy jańǵyrtý jáne basqa da salalar qazaq-amerıkan qarym-qatynastarynyń negizgi baǵyttary sanalady.

Sondaı-aq halyqaralyq jáne óńirlik qaýipsizdik máselesine basa mán berildi.

Bul rette Prezıdent Máskeý oblysyndaǵy lańkestik áreketti Qazaqstan álemde alǵashqylardyń biri bolyp qatań aıyptaǵanyn jáne osyndaı qıyn-qystaý kezeńde Reseımen birge ekenin atap ótti.

Qasym-Jomart Toqaevtyń pikirinshe, barlyq el terrorızmge qarsy kúreste ózara qarym-qatynastaryndaǵy qaıshylyqtarǵa qaramastan, úlken halyqaralyq koalıtsııa aıasynda kúsh biriktirýge tıis. Qazaqstan osy mańyzdy iske óz úlesin qosýǵa daıyn.