Prezıdent «Abý Dabıdiń ornyqty damý aptalyǵy» sammıtinde birinshi bolyp cóz sóıledi
Memleket basshysy sammıtte birinshi bolyp sóz sóıledi. Qasym-Jomart Toqaev búginde álem klımattyń ózgerýi, qýańshylyq, bıoalýantúrliliktiń joıylýy, sý tapshylyǵy jáne azyq-túlik qaýipsizdigi sekildi asa ózekti problemalarmen betpe-bet kelip otyrǵanyn atap ótti. Geosaıası shıelenis pen jetkizý tizbeginiń buzylýyna baılanysty bul jaǵdaı odan saıyn ýshyǵa tústi.
Prezıdent Qazaqstannyń atalǵan túıtkilderdi úsh basty baǵytqa, atap aıtqanda, tsıfrlandyrý men jasandy ıntellekt, iri ınfraqurylymdyq jobalar jáne ıadrolyq energetıka salalaryna negizdelgen strategııa arqyly sheshýge nıetti ekenin jetkizdi.
– Búkil álem boıynsha parnıktik gaz shyǵaryndylarynyń 75 paıyzy energetıkalyq júıelerge tıesili. Bıoalýantúrliliktiń 10 paıyzy sonyń saldarynan joıylady. Osy turǵydan alǵanda, Masdar, Total, Eni sııaqty halyqaralyq seriktesterdiń Qazaqstanda jalpy qýaty 43 GVt bolatyn jasyl energetıka jobalaryn júzege asyrýǵa mindetteme alýynyń máni zor. Elimizdegi alǵashqy atom elektr stantsııasynyń qurylysy otandyq energetıka salasyn ornyqty damytý baǵytyndaǵy eleýli qadam bolmaq. Bul bastama jalpyulttyq referendýmda qoldaý tapqan. Sonymen qatar Qazaqstan álemdik naryqqa asa mańyzdy shıkizat túrlerin jetkizýge umtylyp otyr. Aýaǵa taraıtyn kómirtegi mólsherin azaıtý jónindegi jahandyq maqsatty oryndaý úshin bul materıaldar óte qajet, – dedi Qasym-Jomart Toqaev.