Memleket ardagerlerge árqashan qurmet kórsetedi - Memleket basshysy

ASTANA. QazAqparat - Memleket árqashan Uly Otan soǵysynyń ardagerlerin qurmetteıdi. Bul týraly búgin QR Prezıdenti Nursultan Nazarbaev Keńes Odaǵynyń Batyry Ivan Panfılovqa arnalǵan eskertkishtiń ashylý saltanatynda aıtty.

«Árıne, búgingi eń negizgi sóz soǵys ardagerlerine arnalady. Memleket sizderge shama-sharqynsha kómektesip, qoldap keledi. Sizderdiń árqaısylaryńyz qamqorlyqtasyzdar. Men sizderdiń barlyqtaryńyzdy Jańa jylmen quttyqtadym jáne búgin de sherýde shyn júrekten alǵysymdy jetkizdim. Búrsigúni de barlyq qurmetimiz sizderge arnalady jáne tek merekelerde ǵana emes, únemi solaı bolady. Óıtkeni sizder soǵan laıyqsyzdar», - dedi Memleket basshysy ardagerlerge arnaǵan sózinde.

Nursultan Nazarbaevtyń aıtýynsha, búgingi urpaqtyń atalar qol jetkizgen Jeńisi aldyndaǵy eń basty jaýaby Qazaqstandy turaqty, táýelsiz, birlikshil elge aınaldyrý bolmaq.

«Sizder búgin elimizdiń qalaı damyp kele jatqanyn kórip otyrsyzdar, endeshe tókken qandaryńyz ben soǵysta kórgen azaptaryńyz beker bolmady degen sóz. Sondyqtan árdaıym bizben birge bolyp, jas urpaqty Otanǵa degen súıispenshilikke, patrıotızmge tárbıeleńizder», - dep tujyrymdady Prezıdent.