Memleket aldynda turǵan negizgi mindetterdi belgilep berdi – Máýlen Áshimbaev Prezıdent suhbaty týraly
Senat Tóraǵasy Memleket basshysy suhbatta birqatar ózekti suraqqa egjeı-tegjeıli jaýap berip, el damýynyń aldaǵy jyldardaǵy strategııalyq baǵdaryn baıandaǵanyn jetkizdi.
«Qasym-Jomart Kemeluly atap ótkendeı, sońǵy jyldarda Qazaqstanda asa mańyzdy saıası reformalar júrgizildi. Sonyń nátıjesinde bılik tarmaqtary arasynda tejemelik pen tepe-teńdiktiń tıimdi júıesi quryldy. Saıası ınstıtýttar nyǵaıtylyp, Parlamentte keń ókildik qamtamasyz etildi jáne azamattardyń quqyǵyn qorǵaýdyń pármendi ınstıtýty retinde Konstıtýtsııalyq sot quryldy. Memleket basshysy aıtqandaı, Qazaqstandaǵy saıası reformalar júıeli ǵana emes, eshqashan keri qaıtpaıtyn sıpatqa ıe boldy. Sebebi ulttyń saıası sana-sezimi túbegeıli ózgerdi. Azamattardyń quqyqtyq saýattylyǵy men belsendiligi demokratııalyq jańǵyrýdyń basty kepiline aınaldy. Sondyqtan keri ketýge halyqtyń ózi jol bermeıdi jáne elge jańa lep ákelgen osy ózgeristerdi tabandylyqpen qorǵaıtyny anyq», - dep jazdy Senat Tóraǵasy.
Onyń aıtýynsha, jurtshylyqtyń alǵashqy áserine qarap-aq, qazaqstandyqtar suhbatta aıtylǵan oılardy tolyǵymen qoldaıdy deýge tolyq negiz bar. Máýlen Áshimbaev Prezıdent qasiretti qańtar oqıǵasynyń sebebi men oǵan ne túrtki bolǵanyna nazar aýdarǵanyn, sondaı-aq tergeý nátıjeleri men osy oqıǵadan bárimiz qandaı sabaq alýymyz qajet ekenine de jan-jaqty toqtalǵanyn atap ótti.
«Shyn máninde, biz Memleket basshysynyń elimizdiń zańdaryna, ulttyq múddelerine jáne halqymyzdyń birligine negizdelgen berik ustanymynyń arqasynda Qazaqstannyń jańa tarıhyndaǵy eń shıelenisti kezeńdi eńsere aldyq. Endi eldi toqyraýǵa ákeletin mundaı oqıǵalar eshqashan qaıtalanbaýy kerek. Qazirgi tańda qoǵamda bul másele boıynsha naqty konsensýs bar. Oǵan elimizde Prezıdentimizdiń basshylyǵymen iske asyrylyp jatqan demokratııalyq ózgerister basty kepil bolyp otyr. Memleket basshysy suhbatta ekonomıkalyq damýdyń negizgi basymdyqtaryn da naqty atap ótti. Aldaǵy ýaqytta óńdeý ónerkásibi, ınfraqurylymdyq jobalardy iske asyrý, ekonomıkanyń jańa salalaryn damytý sapaly ekonomıkalyq ózgeristerdiń negizgi draıveri bolmaq. Elimizdiń aldynda 2029 jylǵa qaraı ekonomıka kólemin eki esege arttyryp, 450 mlrd AQSh dollaryna jetkizý mindeti tur. Osyǵan baılanysty Parlament bıyl Bıýdjet, Salyq kodeksterin jáne basqa da qajetti zańdardy qabyldaıdy. Prezıdentimiz ult múddesin qorǵaý, ony ilgeriletý, sondaı-aq, ornyqty damýǵa qolaıly jaǵdaı qalyptastyrý úshin Qazaqstan salıqaly jáne pragmatıkalyq syrtqy saıasatty jalǵastyratynyn aıtty», - dedi Máýlen Áshimbaev.
2024 jyly elimiz óńirlik jáne halyqaralyq deńgeıdegi birqatar yqpaldy uıymdarǵa tóraǵalyq etedi. Bul – Qazaqstannyń halyqaralyq qoǵamdastyqtaǵy jaýapty jáne senimdi seriktes retinde moıyndalýynyń jarqyn kórinisi. Elimiz sheteldik ınvestıtsııa úshin qolaıly jaǵdaı qalyptastyrady. Sondaı-aq óziniń barlyq halyqaralyq mindettemelerin oryndap, jahandyq jáne óńirlik problemalardy sheshýge yqpal etedi.
«Sheteldik seriktester Qazaqstandaǵy turaqtylyqty, syndarly dıalog pen jasampaz yntymaqtastyqty kózdeıtin baǵdardy joǵary baǵalaıdy. Memleket basshysynyń suhbatynda osy jáne basqa da mańyzdy máseleler jan-jaqty talqylanǵan. Onda qoǵamdy alańdatqan kóptegen saýalǵa naqty jaýap berilgen. Sondaı-aq Prezıdentimiz suhbatta damýdyń qazirgi kezeńinde memleketimizdiń aldynda turǵan negizgi mindetterdi belgilep berdi. Osyǵan baılanysty el erteńine beıjaı qaramaıtyn barsha azamattardyń, saıası jáne qoǵamdyq uıymdardyń Prezıdentimiz Qasym-Jomart Toqaevtyń saıası, ekonomıkalyq baǵdaryna qoldaý bildirip, Memleket basshysynyń saıasaty tóńiregine toptasýy, Ádiletti, demokratııalyq jáne ınklıýzıvti Qazaqstan qurý jolyndaǵy reformalardy iske asyrý úshin óz úlesin qosýy asa mańyzdy. Bul – táýelsizdigimizdiń tuǵyryn nyǵaıtyp, memleketimizdiń bolashaǵyn jarqyn etý úshin qajetti shart. Osy maqsatta bárimiz birlesip, elimizdiń damýy jolynda aıanbaı eńbek etemiz dep senemin», - dep jazdy Senat Tóraǵasy.