Memleket «100 jańa esim» jobasyna engen adamdardyń ıdeıalaryn júzege asyrýǵa kómektesedi

ASTANA. QazAqparat - Qazaqstannyń «100 jańa esim» jobasyna engen adamdardyń ıdeıalaryn júzege asyrýǵa memleket kómektesedi. Bul týraly búgin Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda Aqparat jáne kommýnıkatsııalar mınıstri Dáýren Abaev aıtty, - dep habarlaıdy QazAqparat.

«Qazaqstannyń 100 jańa tulǵasy» jobasyn odan ary júzege asyrý úshin mınıstrlik 3 negizgi baǵytta qamtıtyn jol kartasyn ázirledi. Qazirdiń ózinde 100 esimniń bastamalary ómirdiń barlyq salasyn - «jasyl ekonomıka» aıasynda tehnologııalyq ınnovatsııalardy engizýden bastap jetim balalardy qoldaýǵa baǵyttalǵan qaıyrymdylyq jobalaryna deıingi salany qamtıdy», - dedi Dáýren Abaev.

Máselen, onyń aıtýynsha, jobaǵa qatysýshylardyń biri Rıdder qalasynda basqarylmaıtyn shaǵyn sý elektr stansasynyń tájirıbelik úlgisin engizýdi usynǵan. Atalǵan stansa jańaratyn energııa kózderinen alynatyn elektr energııasyn óndirýdi arttyrady. Al Sanjar Myrzaǵalym men Dıas Tastanbekov «Sheberhana» zerthanasy men radıomodeldeý mektebin ashýdy usynyp otyr.

«Mundaı bastamalardy júzege asyrý úshin beıindi jáne jergilikti organdardyń qoldaýy qajet. Osyǵan baılanysty atalǵan jol kartasy barlyq múddeli memlekettik organdardyń kelisimine jiberildi. Jáne de qazirgi ýaqytta Premer-Mınıstr Keńsesiniń qaraýynda jatyr», - dedi mınıstr.

Sonymen qatar ol aǵymdaǵy jyldyń naýryzynda Ortalyq kommýnıkatsııalar qyzmetinde joba qatysýshylaryn kópshilik aldynda sóz sóıleýge daıyndaýǵa baǵyttalǵan semınarlar uıymdastyrylatyn bolady. Odan keıin olar «Rýhanı jańǵyrý» baǵdarlamasynyń arnaıy jobalaryn ilgeriletýge jumyldyrylady.