Memqyzmette basshy laýazymdaǵy áıelderdiń úlesi 40 paıyzdy quraıdy

NUR-SULTAN. QazAqparat – Memlekettik qyzmette basshy laýazymdaǵy áıelderdiń úlesi 40 paıyzdy quraıdy. Bul týraly QR Memlekettik qyzmet isteri agenttigi Memlekettik qyzmet departamenti dırektorynyń orynbasary Dýman Ábilov aıtty, dep habarlaıdy QazAqparat tilshisi.

Onyń aıtýynsha, elimizde memlekettik qyzmette basqarýshy laýazymdarda 9,5 myńnan astam áıel eńbek etedi. Bul basshylardyń jalpy sanynyń 40 paıyzyn quraıdy.

«Bul rette mınıstrlerdiń orynbasarlarynyń – 14,3, óńir ákimderi orynbasarlarynyń – 7,1, ortalyq memlekettik organdar komıtetteri tóraǵalarynyń orynbasarlary men departament dırektorlarynyń – 29,2, ortalyq memlekettik organdardyń aýmaqtyń bólimsheleri basshylarynyń 12,8, oblystyq basqarma basshylarynyń - 15,3, qala jáne aýdan ákimderi orynbasarlarynyń 15,1 paıyzy áıelder», - dedi Dýman Ábilov.

Spıkerdiń aıtýynsha, agenttik konkýrstyq rásimderdiń ashyqtyǵyn qamtamasyz etý úshin júıeli jáne josparly jumys júrgizip otyr. Bul memlekettik qyzmetke ornalasýǵa teń múmkindik jasaýdyń mańyzdy sharty sanalady. Memlekettik organdarda áńgimelesý barysy tehnıkalyq jazba quraldarynyń kómegimen tirkeledi. Sonymen qatar kandıdattar da jazý qurylǵylaryn paıdalana alady.

Kandıdattardan konkýrstyq komıssııanyń sheshimine shaǵym túsken jaǵdaıda zańnamanyń saqtalýy turǵysynan tekserý taǵaıyndalady. 2019 jyly júrgizilgen konkýrstarǵa 52 144 adam qatysqan. Bul rette memlekettik qyzmetke úmitkerlerdiń 24 028-in áıelder qurady. Konkýrs nátıjesinde taǵaıyndalǵan áıelderdiń úlesi 46,2 paıyz boldy.