Memqyzmetshini qosymsha jumysqa jekkenderge aıyppul salynady – agenttik

ASTANA. QazAqparat – Memlekettik qyzmet isteri agenttiginiń tóraǵasy Darhan Jazyqbaev memlekettik qyzmetshilerdiń quqyǵyn qorǵaý boıynsha atqarylyp jatqan sharalar týraly aıtty, dep habarlaıdy QazAqparat tilshisi.

Vedomstvo basshysy memlekettik qyzmetshiler tarapynan shamadan tys ústeme jumys boıynsha shaǵym jıi túsetinin málim etti.

Al agenttik tóraǵasynyń orynbasary Aınur Serǵazıevanyń aıtýynsha, qazir qyzmetshilerge arnalǵan tsıfrlyq kýálikter ázirlengen. Ol arqyly jumyskerdiń qaı ýaqytta ofıske kelgenin jáne qashan qyzmet ornynan shyqqanyn bilýge bolady. Tıisinshe bul aqparattar ortalyqtandyrylǵan Kirýdi baqylaý jáne basqarý júıesine (KBBJ) túsedi.

«Biz barlyǵyn KBBJ arqyly baqylaıtyn bolamyz. Quqyq buzýshylyqtar anyqtalǵan jaǵdaıda, bizdiń qyzmetkerler birinshi basshyǵa habarlama jiberedi. Mundaı jaǵdaı birinshi ret bolsa, eskertý jasaımyz. Al qaıtalansa, onda ákimshilik jaýapqa tartý, ıaǵnı aıyppul salý sharalary qarastyrylýda», - dep toqtaldy Darhan Jazyqbaev Parlament Senatynyń depýtattarymen ótken kezdesýde.

Eske salaıyq, buǵan deıin Eńbek kodeksine birqatar ózgeris engizý josparlanyp otyrǵanyn habarlap edik. Atap aıtqanda, jumys berýshi qyzmetkerdi meıram kúnderi jumysqa shyǵarý úshin kelisimin alýy kerek. Sáıkesinshe, jumysshylar Eńbek kodeksine engizilgen osy ózgeristi alǵa tartyp, kesteden tys jumystan bas tarta alady.