Memqyzmetshilerge jıi biliktiligin jetildirý múmkindigin usyný qajet - agenttik

ASTANA. QazAqparat – Búgin Memlekettik qyzmet isteri agenttiginde QR Parlamenti Senatynyń Konstıtýtsııalyq zańnama, sot júıesi jáne quqyq qorǵaý organdary komıtetiniń kóshpeli otyrysy ótti, dep habarlaıdy QazAqparat tilshisi.

Jıyn barysynda senatorlar agenttik ókilderinen memlekettik qyzmet salasyndaǵy zańnamany odan ári jetildirý úshin usynystaryn surap, pikir almasty. Atap aıtqanda, Senat depýtaty Andreı Lýkın bul baǵyttaǵy jumystardy ilgeriletý maqsatynda Parlament zańǵa qandaı ózgeris engizý qajet ekenin surady.

«Búginge deıin engizilgen zańnamalyq ózgerister memlekettik qyzmetshilerdiń jańa ári sapaly býynyn jasaqtaýǵa múmkindik beredi. Árıne, jetildirýdi qajet etetin baǵyttar bar. Solardyń biri – memlekettik qyzmetshilerdiń biliktiligin jıi jetildirip otyrý múmkindigin usyný. Qazirgi talapqa saı, qyzmetshi 3 jyldyń ishinde 1 ret biliktiligin jetildirýi tıis. Bul tez ózgerip jatqan qoǵamda óte az dep sanaımyz. Sondyqtan memlekettik bıýdjet esebinen qyzmetshilerdiń jıi biliktiligin kóterý boıynsha sharalar qabyldaý oryndy dep esepteımiz. Sebebi, álem, qoǵam ózgerýde. Sonymen birge, jańa tehnologııalar engizilýde. Bul oraıda memlekettik qyzmetshiniń kásibı bilimi tolyǵyp otyrýy mańyzdy», - dep usynys bildirdi QR Prezıdentiniń janyndaǵy Memlekettik basqarý akademııasynyń rektory Erlan Ábil senator saýalyna oraı.

Sonymen qatar, otyrys barysynda agenttik tóraǵasy Darhan Jazyqbaev atalǵan salany jetildirý boıynsha júrgizilip jatqan jumystar týraly baıandady.

Onyń aıtýynsha, memlekettik qyzmetke kirý kezinde artyq kedergilerdi joıý jáne jumystan shyǵý tártipterin jeńildetý boıynsha sharalar iske asyrylýda.