Memqyzmetshilerge syılyq usynatyn azamattarǵa qandaı jaza taǵaıyndalady

NUR-SULTAN. QazAqparat – QR Sybaılas jemqorlyqqa qarsy is-qımyl agenttiginiń seriktestik departamentiniń bas sarapshysy Symbat Israpýlova memlekettik qyzmetshilerdiń zańdy buzyp syılyqtardy alý faktilerin anyqtaý boıynsha qoǵamdyq monıtorıng júrgizilip jatqanyn málim etti, dep habarlaıdy QazAqparat tilshisi.

«Memlekettik qyzmetshilerge qyzmettik mindetterin oryndaǵany úshin kez kelgen sıpatta syılyq usynýǵa tyıym salynady. Eger syılyqtyń quny 2 AEK-ten (5 050 teńge) tómen bolsa, syılyq usynýshyǵa 200 AEK (505 000 teńge) mólsherinde ákimshilik aıyppul salynady. Bul jaǵdaıda syılyqty qabyldap alǵan memqyzmetshige 600 AEK (1,5 mln teńgeden astam) aıyppul kózdelgen. Al, bul somadan joǵary kórsetkishterdiń bári para dep sanalyp, qylmystyq jaýapkershilikke ákeledi», - dedi Symbat Israpýlova agenttikte ótken baspasóz máslıhatynda.

Memlekettik qyzmetshiniń ózi bilmeı kelip túsken, sondaı-aq ol tıisti fýnktsııalaryn atqarýyna baılanysty alǵan syılyqtar jeti kún merzimde arnaýly memlekettik qorǵa tapsyrylýy tıis.

«Bul úshin jergilikti jerdegi memlekettik qyzmetshiler memlekettik múlik jáne jekeshelendirý departamentine júginýi qajet. Shyndyǵyna kelsek, memlekettik qyzmetshilerge 2 myń teńge nemese kámpıt qorabyn usynyp, 200 ese artyq aıyppul tóleýge týra keletin mánsiz «alǵystardyń» saldaryn bilý kerek. Aldaǵy merekeler qarsańynda barlyq memlekettik qyzmetshilerge baǵynyshtylardan jáne basqa da adamdardan syılyqtar alý, bul – ádep pen sybaılas jemqorlyqqa qarsy zańnamany óreskel buzý ekenin eske salamyz», - dedi ol.