Memqyzmetshilerdiń jańa Ádep kodeksi jasalady

NUR-SULTAN. QazAqparat – Memlekettik qyzmet isteri agenttiginde memqyzmetshilerdiń Ádep kodeksin odan ári jetildirý boıynsha sharalar qabyldanýda. Bul týraly Agenttik tóraǵasy Anar Jaılǵanova aıtty, dep habarlaıdy QazAqparat.

«BUUDB-men birlesip jáne múddeli memlekettik organdardyń qatysýymen atqarylǵan jumys nátıjeleri boıynsha memlekettik qyzmetshilerdiń jańa Ádep kodeksi jobasyn ázirleý josparlanýda.Shet elderdiń tájirıbesin eskere otyryp, ádep talaptaryn tek moraldyq-adamgershilik bolyp tabylmaıtyn ózge erejelerden bólýdi iske asyrý usynylady», - dedi Agenttik tóraǵasy 2019 jyl ishinde atqarylǵan jumys qorytyndylaryn, aldaǵy kezeńdegi mindetterdi aıqyndaý boıynsha alqa otyrysynda.

Qazirgi ýaqytta quqyq buzýshylyqtardyń aldyn alýda ádep jónindegi ýákil ınstıtýty basty rólge ıe.

Ádep jónindegi ýákilder óz quzyreti sheńberinde konsýltatsııalyq kómek kórsetip, túsindirme jumystaryn júrgizedi, memlekettik qyzmetshilerdiń zańdarmen kózdelgen shekteýler men tyıymdardy ustanýyna, ózara qarym-qatynastar mádenıetiniń qalyptasýyna yqpal etedi.

Ótken jyly shamamen 17 myń adam elimizdiń barlyq aımaqtarynda jumys isteıtin 764 ádep jónindegi ýákilderge konsýltatsııa alý úshin júgindi.

Ádep jónindegi ýákilder 193 ótinish bildirýshiniń quqyqtaryn qalypqa keltirip, bul kórsetkish ótken eki jyl ishindegi kórsetkishten 69%-ǵa asyp otyr.