Memqyzmetshilerdiń sanyn qysqartamyz - Alık Shpekbaev

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev bıýdjet shyǵyndaryn qysqartý arqyly jalaqyny kóterý máselesine toqtaldy, dep xabarlaıdy QazAqparat tilshisi.

«Prezıdenttiń naqty tapsyrmasy bar. Memlekettik qyzmetshilerdiń jalaqysyn kóterý kerek. Biz atalǵan mindetti oryndaýǵa mindettimiz. Kelesi jyldan bastap enshiles kásiporyndardy ońtaılandyramyz ba, qysqartamyz ba, biraq osy máseleni sheshýimiz kerek. Árıne, keıbir memlekettik organdarda qysqartýlar bolady. Qalaı bolsa da, biz ákimshilik shyǵyndardy qysqartý máselesin jiti baqylaýymyz qajet», - dedi A.Shpekbaev «Astana - adaldyq alańy» jobasy aıasynda ótken jıynda. 

Onyń aıtýynsha, búginde kez kelgen kásiporynnyń uıymdastyrýshylyq-quqyqtyq formasyn aýystyryp, bıýdjettiń biraz qarajatyn únemdeýge bolady. Ol aqshaǵa jalaqyny da kóterýge múmkindik bar. Eń bastysy, myqty ári kásibı basshylar bolýy qajet.

«Máselen, Astandaǵy balalar úıin alaıyq. Biz onyń uıymdastyrýshylyq-quqyqtyq formasyn ózgerttik. Buryn kommýnaldyq memlekettik mekeme bolsa, qazir kommertsııalyq emes aktsıonerlik qoǵam bolyp qaıta quryldy. Sonyń nátıjesinde myqty menedjerler keldi. Naǵyz patrıottar eken. Qyzmetkerlerdiń jalaqysy kóterildi. Buǵan deıin mınımaldy jalaqy 33 myń teńge boldy. Búginde 120 myńǵa deıin kóterildi. Al basshylardyń jalaqysy 120 myń teńgeden 450 myń teńgege deıin ósti. Osynyń ózi bıýdjetti durys basqarý arqyly biraz nárseni ózgertýge bolatynyn kórsetip otyr. Ondaı tájirıbeni keńinen taratýymyz qajet», - dep atap kórsetti A.Shpekbaev.

Aıta keteıik, búgingi jıynda Astana ákimi Áset Isekeshev bıýdjettik sala qyzmetkerlerine 1 mıllıon teńge kólemindegi turǵyn úı kýálikteriniń beriletinin málimdedi.

«Qazirgi kezde biz qala qyzmetkerlerine arnalǵan jańa turǵyn úı baǵdarlamasyn ázirlep jatyrmyz. Ony Turǵyn úı qurylys jınaq banki arqyly iske asyratyn oıymyz bar. Turǵyn úı kýálikteri arqyly biz muǵalimder, dárigerler jáne taǵy basqa mamandardyń baspana máselesin sheshýdi kózdeımiz», - dep atap kórsetti Á.Isekeshev.

Al QR Bilim jáne ǵylym mınıstri Erlan Saǵadıev oqýshylardyń barlyq baǵalaryn onlaın rejımde baqylap otyrǵanyn jetkizdi.

Aldaǵy ýaqytta balabaqshalar arasynda oryndy ózara kelisip aýystyrýǵa tyıym salynbaqshy.