Memqyzmetshilerdiń barlyq deklaratsııalaryna ashyq qol jetkizý máselesin pysyqtaımyz - Smaǵulov

NUR-SULTAN. QazAqparat - Memlekettik qyzmetshilerdiń barlyq deklaratsııalary jarııa túrde bolady. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Memlekettik qyzmet salasyndaǵy baqylaý departamenti dırektorynyń orynbasary mindetin atqarýshy Dıdar Smaǵulov aıtty, dep habarlaıdy QazAqparat tilshisi.

«Qazaqstan zamanaýı sybaılas jemqorlyqqa qarsy saıasatty iske asyryp, sybaılas jemqorlyqqa qarsy is-qımyldyń aldyńǵy qatarly halyqaralyq tájirıbesin belsendi engizýde. Máselen, 2015-2025 jyldarǵa arnalǵan Sybaılas jemqorlyqqa qarsy strategııamen qarastyrylǵan deklaratsııalaý júıesin engizý jemqorlyq kórinisterdi toqtatýdyń nátıjeli ádisteriniń biri bolyp tabylady. Aktıvterdi deklaratsııalaý zańsyz baıý úshin jaýapkershilik uǵymymen tyǵyz baılanysty. Zańsyz baıý - laýazymdy tulǵanyń zańdy tabystarynan eleýli túrde artyp kettetin, ol aqylǵa qonymdy retpen negizdeı almaǵan onyń aktıvteriniń ulǵaıýy», - dedi ol.

Onyń aıtýynsha, jalpyǵa birdeı deklaratsııalaý júıesin engizý - bul zańsyz baıý úshin jaýapkershilikti ornatý baǵytyndaǵy alǵashqy naqty qadam.

«Jeke tulǵalardyń kiristeri men shyǵystaryn deklaratsııalaý búkil álemde qalyptasqan tájirıbe. Onyń negizgi maqsaty ekonomıkalyq ál-aýqatty qamtamasyz etý, kóleńkeli ekonomıka men sybaılas jemqorlyqqa qarsy kúres bolyp sanalady. Sondaı-aq, biz sybaılas jemqorlyqqa qarsy zańnamanyń sýbektileri bolyp tabylatyn memlekettik qyzmetshiler men basqa da adamdardyń jáne olardyń týystarynyń barlyq deklaratsııalaryna jarııalylyq jáne ashyq qol jetkizý máselesin pysyqtaıtyn bolamyz. Bul sybaılas jemqorlyqqa qarsy is-qımyl salasynda azamattyq qoǵamdy jandandyrýǵa múmkindik beredi. Osyndaı jaǵdaılar aıasynda 250 000 teńge resmı tabys alatyn, biraq záýlim úılerde turatyn jáne qymbat kólik quraldaryn paıdalanatyn, ıaǵnı olardyń tabystarynan ondaǵan ese asyp túsetin adamdarǵa ózekti saýaldar qoıylatyn boldy», - dedi D.Smaǵulov.