Memqyzmetshilerdiń alǵashqy legi jańa tártippen basshylyq laýazymǵa taǵaıyndaldy

ASTANA. QazAqparat – Ótken jyldyń sońynan bastap Qazaqstanda memlekettik qyzmetshilerdi taǵaıyndaýdyń jańa tártibi engizildi, dep habarlaıdy QazAqparat tilshisi.

Ózgeriske saı, kandıdattar «B» korpýsy boıynsha memlekettik qyzmetke konkýrstan tys taǵaıyndalady.

«Bul ózgerister byltyr 30 jeltoqsanda Memleket basshysy qol qoıǵan zańmen qoldanysqa engizildi. Osyǵan baınalysty agenttik kelisimi negizinde memlekettik organdardyń 31 qurylymdyq bólimshesiniń basshysy konkýrstyq irikteýsiz taǵaıyndaldy», - dedi QR Memlekettik qyzmet isteri agenttigi tóraǵasynyń tsıfrlandyrý jónindegi orynbasary Aınur Serǵazıeva Parlament Senatynyń depýtattarymen kezdesýde.

Onyń aıtýynsha, aqpan aıynan bastap GPA úlgeriminiń ortasha baly 3.33 bolyp bekitildi. Onyń negizinde memlekettik basqarý akademııasynyń jáne basqa da oqý oryndarynyń túlekterin konkýrstyq irikteýsiz tikeleı taǵaıyndaý júzege asyrylady.

«Qazirgi ýaqytta úzdik túlekter konkýrstyq irikteýsiz laýazymdarǵa taǵaıyndalýy múmkin. Sonymen qatar, memlekettik qyzmetke kirý jáne odan shyǵý tártibin ońtaılandyrý, merıtokratııa qaǵıdatyn ilgeriletý jumystary júıeli negizde júrgizilip jatyr», - dep toqtaldy ol.