Memqyzmetshilerdiń 40 paıyzy Ádep kodeksi normalaryn túsinbeıdi - Álııa Orazǵalıeva
Bul týraly búgin «Bilim» ǵylymı-zertteý ortalyǵynyń mamany Álııa Orazǵalıeva aıtty, dep habarlaıdy QazAqparat.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginde «Memlekettik qyzmetshilerdiń quqyqtaryn qorǵaý salasyndaǵy ádep jónindegi ýákilderdiń jumysyn jetildirý» taqyrybynda ótken keńeste ol atalǵan ortalyqtyń zertteý nátıjelerin jarııa etti. Áleýmettik saýalnamaǵa 1658 adam qatyssa, onyń 44 paıyzy ortalyq memlekettik organdardyń, al 47 paıyzy jergilikti atqarýshy organdardyń qyzmetshileri boldy.
«Saýalnamaǵa qatysýshylardyń 93,1 paıyzy Ádep kodeksiniń mazmunymen tanys ekendigin aıtty. Degenmen, olardyń 32,2 paıyzyna kóptegen tarmaqtary tolyqtaı túsinikti bolmaǵan. Al 38 paıyzy Ádep kodeksiniń negizgi erejelerin túsindirý qajettigin atap ótken. Ortasha eseppen alǵanda tek saýalnamaǵa qatysqandardyń 43,4 paıyzy ǵana kodekstiń ereje normalaryn bilýge qatysty saýaldarǵa durys jaýap bere aldy. 40,8 paıyzynyń jaýaby qate», - dedi Álııa Orazǵalıeva.
Sonymen qatar onyń aıtýynsha, memlekettik qyzmetshilerdiń quqyqtaryn qorǵaý salasyndaǵy ádep jónindegi ýákil ınstıtýtynyń qyzmetine qatysty da saýalnama júrgizilgen. Suralǵan memlekettik qyzmetshilerdiń 73,5 paıyzy memlekettik mekemedegi ádep jónindegi ýákildiń kim ekendigin bilse, qalǵandary jaýap berýge qınalǵan nemese bilmeıtindigin aıtqan. 72,6 paıyz memlekekettik qyzmetshi ýákilge qandaı suraqtarmen júginýge bolatyndyǵyn bilgen.
«Saýalnama nátıjesinde memlekettik qyzmetshilerdiń 71 paıyzy ádep jónindegi ýákilge Kodekstiń saqtalmaýyna qatysty barlyq faktilerdi bastyqtyń jazalaý múmkindigine, qyzmettesteriniń kinálaýyna, ujymdaǵy janjalǵa qaramastan habarlaı alatyndyǵyn aıtqan. Al 13 paıyzy problema nemese janjaldy jaǵdaı týyndaýy múmkin dep esepteıdi», - dedi ortalyq mamany.