Memqyzmetshilerdi qysqartý jumyssyzdyqqa alyp kelmeı me

NUR-SULTAN. QazAqparat - Prezıdent tapsyrmasyna sáıkes 2021 jyldan bastap sheneýnikter men memlekettik qyzmetshilerdi kezeń-kezeńimen qysqartý jumysy qolǵa alynady. Osy oraıda jumyssyzdyq máselesi týyndaýy múmkin be degen suraqqa QR Prezıdentiniń janyndaǵy Memlekettik basqarý akademııasynyń vıtse-rektory, professor Erkin Dúsipov jaýap berdi, dep habarlaıdy QazAqparat tilshisi.

«Memlekettik qyzmetshilerdi qysqartý jappaı jumyssyzdyqqa alyp keledi dep aıta almaımyn. Sebebi bul saıasatty baıaǵydan júrgizip kele jatyrmyz. Búginde elimizde 90 myńnan astam memlekettik qyzmetshi bar. Qysqartqan jaǵdaıda biz birden jumystan shyq demeımiz, barlyǵy zań aıasynda júzege asyrylady. Qysqartýǵa ushyraǵan mamanǵa memlekettik emes nemese kvazımemlekettik uıymdardan jumys tabylýy múmkin. Jalpy memlekettik basqarý salasynda osy sekildi reformalar júrgizý ol zaman talaby jáne prezıdent tapsyrmasy», - dedi Erkin Dúsipov elordadaǵy «ANTIKOR ORTALYGY» -da ótken tikeleı efır barysynda.

Spıkerdiń aıtýynsha, memlekettik qyzmetshilerdi qysqartý jumysy pılottyq joba retinde elimizdiń birneshe óńiri men organdarynda iske asyrylýda.

«Memlekettik qyzmetshilerdiń sanyn azaıtý pılottyq joba retinde Nur-Sultan, Almaty qalasy jáne Mańǵystaý oblysy ákimdiginde júrgizilýde. Odan bólek, Ádilet mınıstrligi jáne burynǵy Memlekettik qyzmet pen sybaılas jemqorlyqqa qarsy agenttik bir organ bolyp turǵan kezde iske asyryldy. Qazirgi ýaqytta barlyq sany 8 memlekettik organda memlekettik qyzmetshiniń sanyn azaıtý jobasy atqarylýda», - dedi ol.

Eske sala ketsek, Memleket basshysy Qazaqstan halqyna arnalǵan bıylǵy Joldaýynda memlekettik apparat pen kvazımemlekettik sektor qyzmetkerlerin qysqartýdy jedeldetýdi tapsyrǵan bolatyn.