Memqyzmetshiler jappaı kıbergıgıenanyń qyr-syryn úırene bastaıdy

ASTANA. QazAqparat - Memlekettik qyzmetshiler jappaı aqparattyq qaýipsizdiktiń qyr-syryn úırene bastaıdy. Búgin Astanada kıbershabýyldarǵa tosqaýyl qoıýǵa arnalǵan forýmda Qorǵanys jáne aeroǵarysh mınıstrligi Aqparattyq qaýipsizdik komıteti tóraǵacynyń orynbasary Rýslan Ábdiqalyqov osylaı málim etti, dep habarlaıdy QazAqparat.

«Málimetterdiń negizgi shoǵyry memlekettik aqparattyq júıelerde jınaqtalǵan. Bul óz kezeginde memqyzmetshilerge qoıylatyn talaptardyń aıtarlyqtaı joǵary ekendigin bildiredi. Sondyqtan olardy laıyqty deńgeıde oqytý kerek. Sebebi memlekettik qyzmetshilerdiń arasynda keıbiri ǵana aqparattyq qaýipsizdikpen aınalysady, alaıda memqyzmetshilerdiń barlyǵy memlekettik aqparattyq júıelermen jumys isteıdi. Osy oraıda biz bul sektordaǵy adamdardyń barlyǵyn kıbersalanyń bastapqy negizderine oqytý maqsatyn qoıdyq. Jumys ornyndaǵy árbir qyzmetshi osy kıbergıgıenany bilýi tıis », -dep naqtylady komıtet ókili.

 Sonymen qatar ol búginde aqparattyq qaýipsizdik júıesi mamandyǵy baǵytynda granttar artatynyn atap ótti.

«Kıberkeńistikten tónip turǵan qaterlerge tıimdi tosqaýyl qoıý úshin bizde daıyndalǵan kadrlar bolýy tıis. Ókinishke qaraı, búginde kadrlar jetispeıdi. Biz QR Bilim jáne ǵylym mınıstrligimen birlese aldaǵy jyldan bastap aqparattyq qaýipsizdik júıesi mamandyǵy boıynsha granttar sanyn eleýli túrde arttyrýǵa ýaǵdalastyq», - dedi R. Ábdiqalyqov.

Budan buryn habarlanǵandaı, forým barysynda elimizde kıbershabýyldar tolqyny kúsheıýi múmkin ekeni aıtylǵan bolatyn. 

Foto: www.massivealliance.com