Memqyzmetshiler Sıngapýrdyń ekonomıkany ártaraptandyrý tájirıbesin zerdeleýde

ASTANA. QazAqparat - Búgin Astanadaǵy Nazarbaev Ýnıversıtetinde Astana memlekettik qyzmet habynyń qoldaýymen memlekettik qyzmetkerler úshin ózgeristerdi basqarý, ekonomıkany ártaraptandyrý jáne ınvestıtsııalardy yntalandyrý boıynsha eki kúndik semınar bastaldy. Semınardy Sıngapýrdaǵy Lı Kýan ıÝ atyndaǵy Memlekettik saıasat mektebiniń professory Lım Sıong Gýan myrza ótkizýde. Ol buryn Sıngapýrdyń Memlekettik qyzmet agenttiginiń basshysy, Ekonomıkalyq damý jónindegi Keńestiń tóraǵasy, Sıngapýrdyń GIC Derbes ál-aýqat qory tobynyń prezıdenti qyzmetin atqarǵan, dep habarlaıdy QazAqparat.

Memlekettik qyzmet salasyndaǵy óńirlik habtyń Basqarýshy komıtetiniń tóraǵasy Álıhan Baımenov semınardy ashý barysynda ozyq elderdiń tájirıbesimen tanysýdyń mańyzyn atap ótti.

«Kez kelgen úkimet basqa memleketter tájirıbeleri men sheshimderinen óz eline barynsha qajettisin  tabý úshin olardy zerdeleýi kerek. Sıngapýr - memlekettik basqarý reformalary salasynda kóshbasshylardyń biri ári olardy tıimdi iske asyrýda tabysty úlgi kórsetti. Sondyqtan osy eldiń tájirıbesi Qazaqstan úshin úlken qyzyǵýshylyq týdyrýda», - dedi Tóraǵa.

Sharanyń alǵashqy kúni Prezıdent Ákimshiliginiń basqarýshy býyn qyzmetkerleri, mınıstrlikterdiń jaýapty hatshylary jáne ortalyq memlekettik organdardyń apparat jetekshileri memlekettik qyzmettegi ózgeristerdi basqarý boıynsha dáris aldy. Atap aıtqanda, olar Sıngapýrdyń memlekettik sektordy reformalaý tájirıbesimen tanysyp, ony Qazaqstan kontekstinde talqylady. Olar sondaı-aq, memlekettik qyzmetkerlerdiń saıası kásipkerler men novatorlar retindegi rólin qarastyrdy. Lım myrza memlekettiń damý barysyna qaraı úkimettiń róli baqylaýshy men retteýshiden dánekershige, sodan keıin uıymdastyrýshy men yntalandyrýshyǵa deıin jetilýi tıis ekenin aıtty.

Ekinshi kúni QR Prezıdenti Ákimshiligi men Premer-Mınıstri Keńsesi, Ulttyq ekonomıka mınıstrliginiń, Investıtsııalar jáne damý mınıstrliginiń qyzmetkerleri úshin «Ekonomıkalyq ártaraptandyrý jáne ınvestıtsııalardy yntalandyrý: Sıngapýr tájirıbesi» taqyrybynda semınar josparlanǵan. Qatysýshylar ekonomıkany ártaraptandyrý jáne óndiristik damý joldarymen,  memlekettiń uzaq merzimdi damýyn qoldaýda fıskaldyq jáne qarjylyq basqarýdyń rólimen tanysady, oǵan qosa sıngapýrlyq tájirıbeni Qazaqstan ekonomıkasyna is júzinde qoldaný máselelerin talqylaıdy.