Memqyzmetshi esepshotyna kelip túsken syılyq aqshany ne isteýi kerek
Májilistiń jalpy otyrysynda «QR-nyń keıbir zańnamalyq aktilerine sybaılas jemqorlyqqa qarsy is-qımyl máseleleri boıynsha ózgerister men tolyqtyrýlar engizý týraly» zań jobasyn talqylaý barysynda depýtat Meıram Pishembaev qaralyp otyrǵan qujattyń 12-babyna qyzmetkerlerge nemese olardyń otbasy múshelerine habardar etilmeı kelip túsken syılyqty kúntizbelik 7 kún ishinde memlekettik múlikterdi basqarý jónindegi ýákiletti organǵa óteýsiz berý kózdelgen norma enizilgenine nazar aýdardy.
«Osyǵan oraı meniń mynadaı suraǵym bar. Árıne, ómir bolǵan soń ártúrli jaǵdaı bolady. Keıbir kezde oılamaǵan, kútpegen oqıǵalar kez kelýi múmkin. Máselen, memlekettik organnyń basshysy nemese qyzmetkeri ne olardyń otbasy músheleri shotyna túsken syılyq týraly habardar bolmasa, ne isteýi kerek?», - dep surady depýtat Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenovten.
Agenttik tóraǵasynyń birinshi orynbasary bul norma qoldanystaǵy zańnamada bar ekenin, jańadan engizilgen talap emestigin atap ótti.
«Eshqandaı jańadan tyıym salynbaıdy. Rasynda da, memlekettik qyzmetshi ne onyń otbasy músheleriniń esepshotyna aqsha aýdarymy tússe, onda olar ony bilmeýi de múmkin. Mundaı jaǵdaıda 7 kúnniń ishinde bul aqsha memlekettik bıýdjetke aýdarylýy tıis. Al syılyqqa keletin bolsaq, bizdiń pikirimizshe, syılyqty alý men ony anyqtaý bir mezette oryn alatyn jaǵdaı dep aıtýǵa bolady. Sondyqtan osyndaı norma qoldanystaǵy zańda bar», - dedi ol.