«Memqyzmetkerler ómir boıy oqyp ótedi» - baspasózge sholý
«Memqyzmetkerler ómir boıy oqyp ótedi». «Aıqyn» basylymynyń búgingi sanynda osyndaı taqyryppen memlekettik qyzmettegi reformalar jaıynda maqala jarııalandy.
«Aldaǵy jyly elimizde «Memlekettik qyzmet» týraly jańa zań qabyldaý jospary tur. Eger zań jobasy kúshine enip jatsa, onda memlekettik qyzmetkerlerdiń biliktiligine qoıylatyn talap kúsheıtiledi. Máselen, memqyzmetkerler ár úsh jylda bir ret kásibı biliktiligin arttyrýǵa mindetti bolady», - dep jazady gazet.
«Memlekettik basqarý akademııasy jańa zań talabyna sáıkes ári kásibı memlekettik apparatty qurý reformasyna baılanysty ózderiniń bilim berý baǵdarlamasyn ózgertpekshi eken. Máselen, akademııa aldaǵy oqý jylynan bastap «Qyzmetkerlerdi basqarý» dep atalatyn jańa mamandyqty engizip otyr. Bul mamandyqty oqyp shyqqan kadr bóliminiń mamandary memlekettik qyzmetkerlerdi iriktep, olardyń qyzmettik ósý jolyn josparlap beretin bolady», - delinedi maqalada.
Kelesi jyly Qazaqstan jer-jahanǵa jar salyp, bilikti sýdıalar arasynda baıqaý jarııalaıdy dep kútilýde, dep habarlaıdy «Aıqyn» gazeti.
«Elbasynyń «100 qadam» Ult josparyna, sondaı-aq «Astana» halyqaralyq qarjy ortalyǵy jáne Ulttyq bankti Astana qalasyna kóshirý týraly» Elbasynyń bıylǵy 19 mamyrdaǵy Jarlyǵyna sáıkes, sheteldik sýdıalardy tarta otyryp, elordada jeke «qarjy sotyn» qurý kózdelgen. Ulttyq sot júıesinen táýelsiz jumys jasaıtyn bul sottaǵy sheteldik sýdıalar ınvestıtsııalyq daýlardy qaraýmen aınalysady», - delingen «Aǵylshyn-saksondyq baǵytty ustanamyz» atty maqalada.
Gazettiń jazýynsha, onyń taǵy bir ereksheligi, biz úlgige alyp otyrǵan «Dýbaı» ortalyǵyndaı, «Astana» qarjy ortalyǵynyń sýdıalary da aǵylshyn-saksondyq quqyqty ustanatyn bolady.
«Bir aıta keter jaıt, Qazaqstannyń ózi «kontınentaldyq quqyq» júıesine nemese «romandyq-germandyq quqyqtyq otbasyǵa» jatatyny málim. Árıne, mamandar jaqsy biledi, degenmen bulardyń arasyndaǵy aıyrmashylyqqa qarapaıym tilmen toqtala ketken jón. Atap aıtqanda, Qazaqstan HH ǵasyrdan beri resmı túrde úlgige qabyldaǵan jáne álemniń basym kópshiliginde qoldanylatyn kontınentaldyq quqyqta sýdıalardyń barlyǵy «jazylǵan quqyqqa», ıaǵnı zańǵa, Jarlyqqa, qaýlyǵa jáne basqa da quqyqtyq qujattarǵa súıenedi», - deıdi maqala avtory.
«Biz óz ólkemizdiń táýelsizdik jyldary ósip-órkendeýiniń bar ıgilikterin Elbasy Nursultan Nazarbaevtyń esimimen tyǵyz baılanystyramyz», - deıdi atalmysh maqalasynda L.Qıynov.
«Egemen Qazaqstan» gazetinde «Abyroıy asqan kıeli túbek» degen taqyryppen Qazaqstan Respýblıkasy Parlamenti Senatynyń depýtaty Lázzat Qıynovtyń maqalasy jarııalanyp otyr. Onda depýtat Qazaqstan Prezıdenti N.Nazarbaevtyń Mańǵystaý óńiriniń damýyna qosqan úlesi týraly baıan etedi.
«Ásirese, Elbasynyń aǵartýshy abyz, úlken dinı qaıratker Beket atanyń óz qolymen salǵan meshitine qarjy bólgizip, qaıta óńdeýden ótkizip, basyna kelip taǵzym etýshilerge arnalyp turǵyn jaı salyp bergendigin túbek halqy ańyz qylyp aıtyp otyrady. Elbasy Nazarbaev 2001 jyldyń 6 qyrkúıeginde Aqtaý teńiz portynda bolyp, Aqtaý - Irannyń Noýshahr, Aqtaý - Baký, Aqtaý - Reseıdiń Olıa baǵyttaryndaǵy kóliktik baılanys paromynyń ashylýyna jáne de 2002 jyldyń sáýir aıynda Aqtaý teńiz porty erkin ekonomıkalyq aımaq bolyp qurylýyna bastamashyl bolsa, qazirgi ýaqytta Elbasynyń «Qazaqstan-2050» Strategııasyna sáıkes, jańadan avtokólik jáne temirjoldar salynyp, túbektiń damýynyń jańa múmkindikteri ashylýda», - deıdi depýtat.
«Mańǵystaý jeriniń eń bıik núktesi - Otpan taýynyń basynda «Otpan tarıhı-mádenı kesheniniń» de ashylýy jáne aldaǵy ýaqytta bul arada qazaq halqynyń júrip ótken joldary týraly syr shertetin murajaı boı kóterip, kelýshilerge qyzmet kórsetetin túrli mádenı oshaqtar salyný isi de qolǵa alynyp jatyr», - dep jazady óz maqalasynda Mańǵystaý óńiriniń týmasy L.Qıynov.
«Qytaıda qazaq kúresinen Azııa chempıonaty ótti», dep habarlaıdy «Egemen Qazaqstan».
«Jaqynda Qytaı Halyq Respýblıkasynda qazaq kúresinen HІ Azııa chempıonaty ótti. Oǵan 19 eldiń komandasy qatysty. Asa tartysty jáne qyzyqty ótken jarysta Qazaqstan balýandary bes altyn medaldi jeńip aldy. Bir altyn júldeni Qytaı ókili ıelendi», - delingen maqalada.
«Chempıonat óte jaqsy deńgeıde ótti. Bıylǵy Azııa chempıonatyn biz Qytaıdyń Shyńjań-Uıǵyr avtonomııaly raıony Іle-Qazaq oblysynyń Altaı qalasynda ótkizdik, - deıdi Dúnıejúzilik qazaq kúresi federatsııasynyń birinshi vıtse-prezıdenti, Azııa federatsııasynyń prezıdenti Marat Shámshinurov. - Stadıonda beldesýlerdi 35 000 adam tamashalap otyrdy. Mundaı kórermen eshqashan, esh jerde bolǵan emes. Tipti, stadıonnyń syrtynda kópqabatty úılerdiń balkonynda turyp, shatyryna shyǵyp, tamashalaǵan adamdardy da kórdik...Jalpy, Іle-Qazaq oblysy qazaqtyń qaımaǵy buzylmaǵan jeri. Sol sebepti, otyz tisten shyqqan sóz otyz rýly elge taraıdy degen sóz bar emes pe, biz Azııa chempıonatyn ótkizemiz degenshe Qytaıdyń ózinde de, basqa elderde de halyq jarystan habardar bolyp shyqty. Ony álemniń 35 telearnasy kórsetti. Qytaıdyń 30 tilshisi, Iran, Irak, Úndistan, basqa da elderdiń jýrnalısteri kelip, habar taratty. Jańa chempıonat eki kúnge sozyldy dedim ǵoı, sony halyq eki kún qatarynan tikeleı efırden tamashalady».
Búgin resmı tilde jarııalanatyn «Ekspress K» basylymynda «Nasılno mıl mne býdesh?» atty maqala jarııalanyp, onda Atyraý oblysynda 14 balanyń zorlanǵany týraly habar tarady.
«Bıyl Atyraý oblysynda kámelettik jasqa tolmaǵan 14 bala zorlaýshylardyń qurbany boldy. Onyń ústine zardap shekken balalarǵa olar týys bolyp keledi», - delingen maqalada.
«Zorlaýshylardyń qurbandary kámelettik jasqa tolmaǵandar ǵana emes, tipti kishkentaı balalar da bolyp kelgen. Bul jantúrshigerlik qylmystardyń barlyǵy ashyldy. Sondaı tragedııalardyń oryn alýyna ata-analardyń nemese pedagogtardyń balaǵa kóńil bólmeýi nemese kámelettik jasqa tolmaǵandardyń óz júris-turysy sebep bolady. Máselen, polıtsııaǵa kámelettik jasqa tolmaǵan qyzdy zorlady degen aryz-shaǵym tústi. Ol qyz alty aılyq merzimde aıaǵy aýyr bolǵan. Keıin anyqtalǵanyndaı, mektep oqýshysy jigitpen júrgen, keıin aıaǵy aýyr ekenin bilgende, ata-anasynyń qaharynan qorqyp, zorlanǵanyn habarlaǵan. Nátıjesinde is jabyldy», - delingen maqalada.