Memqyzmetkerler bastyqtyń tapsyrmasymen jumysta keshke deıin otyratynyn ashyq aıta bastady
Memlekettik qyzmet salasyndaǵy baqylaý departamenti dırektorynyń mindetin atqarýshy Madına Naýryzbektiń aıtýynsha, búginde memlekettik organdarda jumys kestesin buzyp, keshke deıin jumys isteý faktileri birtindep azaıyp keledi. Alaıda ondaı oqıǵalar áli de bar. «Mysaly, QR Qarjy mınıstrliginde ústeme jumystardyń aıtarlyqtaı azaıýyna qaramastan, 1424 Call-ortalyǵyna mınıstrliktiń áleýmettik sala bıýdjeti departamentiniń memlekettik qyzmetshileri habarlasyp, jumys kestesiniń buzylýyna shaǵymdandy. Olardyń sózderine sáıkes, memlekettik qyzmetshiler jumys oryndarynda saǵat 18.30-dan keıin basshylyqtyń talaby boıynsha qalyp otyrady. Sosyn keshki jumys májilisteri kóp deıdi. Osyǵan baılanysty, agenttik úkimettik emes uıymdardyń ókilderimen birlese otyryp, profılaktıkalyq is-sharalar ótkizdi. Sonyń qorytyndysy boıynsha atalǵan faktiler rastaldy», - dedi M.Naýryzbek Astanada ótken baspasóz máslıhatynda.
Atalǵan máseleni QR Eńbek jáne halyqtyq áleýmettik qorǵaý mınıstrligi de jiti baqylaýda ustap otyr. Eńbek, áleýmettik qorǵaý jáne kóshi-qon komıteti tóraǵasynyń orynbasary Tólegen Ospanqulovtyń sózine qaraǵanda, ótken jyldyń sońynda eńbek zańnamasyn saqtaý boıynsha barlyq aımaqtar tekserildi. Sonyń nátıjesinde ortalyq organdardyń 6 basshysy ákimshilik jaýapkershilikke tartyldy. Olardyń arasynda QR Din isteri jáne qoǵamdyq damý mınıstrligi, QR Densaýlyq mınıstrligi, QR Ádilet mınıstrligi, QR Bilim jáne ǵylym mınıstrligi, QR Aýyl sharýashylyǵy mınıstrligi men QR Ulttyq ekonomıka mınıstrligininiń laýazymdy tulǵalary bar. Solardyń qaramaǵynda isteıtin qyzmetkerler jumysta óz erkimen emes, bastyqtardyń tapsyrmasy boıynsha qalǵanyn ashyq aıtty. «Iá, basshylyqtyń tapsyrmasymen jumysta kesh qaldyq dep, ashyq aıtqan qyzmetkerler de boldy. Biraq basym bóligi óz erkimen qalyp otyrǵanyn jetkizdi. Negizi, qyzmetker basshylyqtyń tapsyrmasymen jumysta qalyp otyrsa, mańyzdy bir máseleni umytpaý qajet. Árbir jumysshynyń, sonyń ishinde memlekettik qyzmetkerdiń ózine júktelgen mindetterinen bólek quqyqtary da bar. Sondyqtan ony demalysta, ıa bolmasa mereke kúnderi jumysqa tartsa, mindetti túrde jazbasha kelisimi bolýy qajet. Ondaı kelisim bolmasa, qyzmetkerdi jumysqa salýǵa bolmaıdy. Ol adamǵa qysym jasaýǵa da ruqsat joq», - dep atap kórsetti T.Ospanqulov.
Aıta keteıik, búgin QR Memlekettik qyzmet isteri jáne sybaılas jemqorlyqqa qarsy is-qımyl agenttigi artyq jumys jasaý faktilerine qatysty kezekti tekseristiń nátıjesin jarııalady. «Bıyl qańtar aıynda memlekettik organdarda ústeme jumys faktileri boıynsha «SKÝD» júıesiniń derekterine kezekti taldaý júrgizildi. Ótken jyldyń qyrkúıek jáne jeltoqsan aılarymen salystyrǵanda oń serpin baıqalady. 2018 jyldyń qyrkúıeginde 12 739 saǵat bolsa, jeltoqsanda memorgandarda artyq jumys 4 790 saǵatqa deıin azaıdy. Al qańtar aıynda atalǵan kórsetkish 1 194 saǵatqa deıin qysqardy», - dedi M.Naýryzbek.
Onyń aıtýynsha, birqatar memlekettik organdarda artyq jumys jasaý faktileri múldem joıyldy deýge bolady. Sonyń ishinde QR Indýstrııa jáne ınfraqurylymdyq damý mınıstrligi, QR Ádilet mınıstrligi, QR Bilim jáne ǵylym mınıstrligi, QR Qorǵanys jáne aeroǵarysh ónerkásibi mınıstrligi, QR Mádenıet jáne sport mınıstrligi bar.
«Qalǵan memlekettik organdarda ústeme jumys faktileriniń aıtarlyqtaı azaıǵany baıqalady. Aımaqtarda da solaı. Sonymen qatar, jekelegen mınıstrlikterde áli de ústeme jumys faktileri bar. Mysaly, QR Syrtqy ister mınıstrliginde qańtar aıynda 369 saǵat ústeme jumys anyqtaldy. QR Densaýlyq saqtaý mınıstrliginde 151 saǵat anyqtaldy. Osyǵan baılanysty barlyq memlekettik organdarǵa tıisti sharalardy qabyldaýǵa qatysty usynystar berildi», - dep atap kórsetti M.Naýryzbek.