Memqyzmetke qabyldaý kezindegi áńgimelesýdi onlaın kórsetý múmkindigi qarastyrylýda

NUR-SULTAN. QazAqparat - Qazaqstanda memlekettik qyzmetke qabyldaý kezinde onlaın rejimde úmitkermen suhbattasý barysyn jazyp alý qarastyrylyp jatyr. Bul týraly ınternet-konferentsııa barysynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasynyń orynbasary Aıgúl Shaıymova málim etti, dep habarlaıdy QazAqparat tilshisi.

Atap aıtqanda, «Ashyq dıalog» portalynda naqty ýaqyt rejimindegi ınternet-konferentsııada ákimshilik memlekettik laýazymdy ıelenýge konkýrsty ótkizý erejesine sáıkes, árbir kandıdatpen suhbattasý barysy tıisti tehnıkalyq quraldarymen jazylatyny eske salyndy.

«Qyzmetke turý protsesiniń barynsha ashyqtyǵy turǵysynda konkýrs jarııalaǵan memlekettik uıymnyń resmı saıtynda suhbattasýdyń vıdeo jazbasyn ornalastyrý múmkindigi bar ma? Sonymen qatar, áleýmettik jelilerde kandıdatpen suhbattasýdyń tikeleı efırin júrgizý múmkindigi qarastyryla ma?», - dep surady Tımýr Muqashev esimdi azamat.

Óz kezeginde Aıgúl Shaıymova memlekettik qyzmetke irikteýdi jetildirý sharalaryna toqtaldy.

«Memlekettik qyzmetke irikteý rásimin ary qaraı jetildirý aıasynda, agenttik onlaın rejimde suhbattasý barysyn jazýdy qamtamasyz etýdiń múmkindigin zerttep jatyr. Derbes derekter jáne ony qorǵaý týraly zańnamasynyń talaptaryn oryndaý qajettigin eskere otyryp, atalǵan másele ókiletti memlekettik organdarmen birlese pysyqtalýda», - dedi A. Shaıymova.