Memqyzmet kórsetýdegi jańalyqtar turǵyndarǵa kóp jeńildik jasaıdy - Májilis tóraǵasy

NUR-SULTAN. QazAqparat - Memlekettik qyzmetterdi kórsetýde engizilgen jańalyqtardy halyq arasynda keńinen túsindirý kerek. Bul týraly Parlament Májilisiniń tóraǵasy Nurlan Nyǵmatýlın palatanyń jalpy otyrysynda málim etti, dep habarlaıdy QazAqparat tilshisi.

Atap aıtqanda, búgin palata depýtattary «Qazaqstan Respýblıkasynyń keıbir zańnamalyq aktilerine memlekettik qyzmetter kórsetý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.

«Búgin barshamamyz talqylaǵan zań jobasy halqymyz úshin óte mańyzdy ári óte qajetti. Sebebi Qazaqstandaǵy árbir azamattyń qajettilikteri memlekettik qyzmet kórsetý baǵytynda retteledi. Sondyqtan memqyzmetti kórsetý árqashan da zaman talabyna saı jańaryp otyrýy kerek. Munymen qosa, osy saladaǵy jumystar qoljetimdi ári sapasy joǵary deńgeıde bolýy tıis», - dep toqtalda Májilis tóraǵasy.

Osy oraıda N. Nyǵmatýlın Elbasy Nursultan Nazarbaev 2020 jyly 90 paıyzǵa deıin elektrondy formatta memqyzmetterdi kórsetý maqsatyn qoıǵanyn eske saldy.

Atap aıtqanda, depýtattar Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý boıynsha, sondaı-aq zań jobasynyń jekelegen normalaryn naqtylaıtyn jáne mazmunyn jaqsartatyn túzetýler engizdi. Jumys tobyna depýtattar men komıtetterden 578 usynys kelip túsip, múddeli mınıstrlikter, vedomstvolar jáne qoǵamdyq uıymdar ókilderiniń qatysýymen jumys tobynyń bes otyrysynda, Komıtettiń keńeıtilgen otyrysynda talqylandy. Osynyń nátıjesinde, memqyzmetterdi alý úshin jınalatyn qujattar kólemi eleýli túrde qysqarady dep kútilýde.

«Túzetýler qashyqtyqtan turǵyndarǵa barlyq qajetti memlekettik qyzmetterdi alýǵa múmkindik beredi. Búginde keıbir qyzmetterdi qashyqtyqtan alýǵa bolady. Alaıda kóp jaǵdaıda bizdiń azamattar Halyqqa qyzmet kórsetý ortalyǵyna baryp, kezekke turyp jatady. Negizi, bul qyzmetti olar úıden shyqpastan alýyna jaǵdaı jasalǵan», - dedi Májilis tóraǵasy.

Osy oraıda ol halyq arasynda aýqymdy túsindirý jumystaryn júrgizý kerektigin atap ótti.

Budan buryn habarlanǵandaı, Budan buryn habarlanǵandaı, atalǵan zań jobasy aıasynda zeınetaqy qujattaryn rásimdeýde ózgerister bolady.

Sonymen qatar, Qazaqstan aýmaǵyndaǵy kez kelgen tirkeýshi organǵa ótkizýge bolatyny aıtylǵan edi.