Memqyzmet - kásibılikti jáne kúızeliske tózimdilikti talap etetin jumys

NUR-SULTAN. QazAqparat - Tanymal psıholog, «Aqmola oblysy boıynsha azamattyq alıansy qaýymdastyǵy» zańdy tulǵalar birlestiginiń jetekshisi Irına Terenteva QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqmola oblysy boıynsha departamenti ujymyna arnap psıhologııalyq trenıng ótkizdi, dep habarlaıdy QazAqparat.

Memlekettik qyzmet - bul kóp eńbek etýdi qajet etetin, óte jaýapty, joǵary kásibı dárejeniń jáne kúızeliske tózimdiliktiń bolýyn talap etetin aýyr jumystardyń biri. Bul qyzmette árqashan da jaǵymdy psıhologııalyq klımat pen emotsıonaldyq qysymdy sheshý múmkindikteri joǵary baǵalanady.

Trenıng barysynda túrli psıhologııalyq jattyǵýlar uıymdastyrylyp, olar memlekettik qyzmetshilerge óz bolmystaryn odan da jaqsy túsinýge, áldeqaıda úılesimdi bolýǵa, ózderiniń jaqsy jáne jaman jaqtaryn kórýge, ózge adamdardy jaqsy túsinýge múmkindik berdi.

Sonymen qatar trenıngke qatysýshylar memlekettik qyzmetshilerdiń boıynan tabylýǵa tıisti joǵary moraldyq qasıetterdi talqylady. Parasattylyq, jaýaptylyq, pragmatızm, ıkemdilik, kúızeliske tózimdilik, senimdilik sııaqty qasıetterge basa nazar aýdaryldy.

Departament basshysy Bergen Bespalınovtiń aıtýynsha, ujym ishindegi jaǵymdy ári jaıly klımat - ol tabysy eńbek úderisiniń mańyzdy elementi bolyp tabylady.

«Psıhologııalyq jaılylyq bylaısha aıtqanda jumys úderisine jáne ózara birlesip atqarylatyn eńbektiń nátıjesine tikeleı yqpal etedi, sol sebepti memlekettik qyzmetshilerdiń arasyndaǵy sapaly ózara árekettestikke zor kóńil bólgen durys» - degen pikirin bildiredi Bespalınov.