Memhatshy: Saýytbek Abdrahmanov táýelsiz Qazaqstannyń rýhanııat salasyn baıytýǵa ólsheýsiz úles qosty
«Saýytbek Abdrahmanov - Táýelsiz Qazaqstandy qurýǵa jáne onyń rýhanııat salasyn baıytýǵa ólsheýsiz úles qosqan ardaqty azamattardyń biri, elimizdiń Aqparat mınıstri, bas basylymnyń basshysy retinde jas memleketimizdiń tarıhynda qalǵan tulǵa. Sáýkeń jemisi mol 70 jasqa memleket jáne qoǵam qaıratkeri, salıqaly saıasatker, qarymdy qalamger atanyp, abyroımen jetti. Shyǵarmashylyǵy laıyqty baǵalanyp, memlekettik syılyq ıelendi. El-jurttyń aldynda bedeldi halyq qalaýlysyna aınaldy. Aýdarmanyń qyr-syryn, Pýshkın týyndylarynyń tabıǵatyn zerttep, ádebıettanýshy ǵalym atandy. Sóziniń salmaǵy bar, isiniń ónegesi bar Sáýkeńdi qurmettep, búgingideı halyqaralyq konferentsııa ótkizý óte oryndy dep sanaımyn», - dedi is-sharany ashqan QR Memlekettik hatshysy Qyrymbek Kósherbaev.
Qyrymbek Kósherbaev mereıtoı ıesin álemniń 61 memleketin aralap, qyzyqty reportajdar men ocherkter jazǵanyn, kóptegen memleket basshylarymen suhbat qurǵanyn, aýdarma salasynda da qarymdy eńbek etkenin atap ótti.
«Sáýkeń – synshy. Kınonyń da, ádebıettiń de synshysy. Keıde memlekettik qyzmetshilerge de syn kózben qaraıtynyn baıqaımyz. Maqtap otyryp, maqtamen baýyzdaıtyn sóz zergeriniń oryndy syny men oıly maqalalary tutas salanyń keńeıýine súbeli úles qosty», - dep atap ótti Memlekettik hatshy.
Al memleket jáne qoǵam qaıratkeri Myrzataı Joldasbekov Saýytbek Abdrahmanovtyń mádenıetti, ınabatty, kishipeıil, bilimdi, jaza da alatyn, aıta da alatyn tereń oıdyń adamy, kórnekti tulǵa ekendigin atap ótti.
«Sabyrly, baısaldy, syıly azamat, úlken parasat ıesi, belgili memleket qaıratkeri. Qazaqstan ortalyq partııa komıtetinde, keıin Úkimette Ábish, Imanǵalı, Qyrymbek, Tólen, Álibek, Saýytbek - bárimiz birge qyzmet ettik. Jaqsy jyldar edi. Qıyn bolsa da esimizde qaldy. Aǵaly-inili boldyq. Saýytbek búginde - depýtat, kórnekti jýrnalıst, belgili ádebıetshi ǵalym, memlekettik syılyqtyń ıegeri. Maqtaýǵa da, maqtanýǵa da turatyn úlken azamat», - dedi Myrzataı Joldasbekov.
QR Prezıdentiniń keńesshisi, QR UǴA akademıgi Baýyrjan Omarov bolsa mereıtoı ıesin ıýmorǵa toly sózimen quttyqtap, is-shara qatysýshylarynyń kóńilin kóterdi.
«Saýytbek Abdrahmanov - anyqtaýshysy alty aýyz sózdi quraıtyn eleýli esim, qarymdy qalamger, qajyrly qaıratker, salıqaly saıasatker, mańǵaz memlekettik qyzmetshi, dańqty depýtat, shıraq sheneýnik, mártebeli mınıstr, aıbarly aqparatshy, azýly apparatshy, alymdy aýdarmashy, áleýetti ádebıettanýshy, parasatty Pýshkıntanýshy. Osy áserli epıtetterdiń bári onyń ómir jolynyń ár tusyn órnekteıdi. Endi mine oǵan búgin 70-tegi jigit degen tamasha tirkes qosyldy. Ómir bar jerde ıýmor bar. Sol ıýmordan mereıtoı ıesiniń ózi de kende emes. ıÝmordy sezinbegen adam ómirdi sezinýden qalady. Sondyqtan jyly lebizimizdi jarasymdy ıýmorǵa bólep otyryp, sizdiń erekshe qasıetterińizdi sanamalap kóreıik. Er jigitke keregi baq pen bap. Sonyń sizde ekeýi de bar. Bastaǵy baǵyńyz ben úıdegi babyńyz ózińizdi únemi alǵa jetektep keledi. Búkil aqparat quraldarynyń jıyntyq ataýy retindegi óńkeı bas árippen jazylatyn BAQ-ta sizden ajyraǵan joq. Endeshe túrli árippen jazylatyn túri baqtaryńyz sizge serik bola bersin! Baǵyńyz da, babyńyz da qatar órleı tússin: Tek ıýmordy keremet túsinseńiz de, sol ıýmordy aıtqanda onsha qatty kúlmeıtindigińiz, kúlip bola sala ezýińizdi tez jınap alatynyńyz, bir qaraǵan adamǵa sál sýyqtaý kórinetindigińiz, ózińizdi asa qatty bilińkiremeıtin jannyń kózimen zer salǵanda eptep qana syzdanyp, azdap qana muzdanyp turatyndyǵyńyz bolmasa, jalpy óte meıirimdi adamsyz», - dep ázilge burdy Baýyrjan Omarov.
«Elimizdiń, halqymyzdyń qazirgi qalamgerleri ishinde orny bólek Saýytbek Abdrahmanulymen biraz jyldan beri joldaspyz. Sákeńniń qalamgerlik dárejesine baǵa berýden aýlaqpyn. Áıtse de, oılanyp oqıtyn oqyrmandarynyń biri retinde baspa betine shyqqan kitaptaryn, maqalalaryn minberden sóılegen sózderin oqyp, tyńdaǵanda erekshe áser alatyndardyń birimin. Abaı babamyz: «ózin alma, sózin al» degen eken. Saýytbek Abdrahmanuly - ózin de, sózin alýymyz kerek azamat», - dep atap ótti óz kezeginde memleket jáne qoǵam qaıratkeri Baqtyqoja Іzmuhambetov.
L.Gýmılev atyndaǵy EUÝ rektory Erlan Sydyqov ult zııalylarynyń «Mádenıet – Qudaıdan keıingi zor kúsh» degen danalyǵyn qalamger, ǵalym Saýytbek Abdrahmanov zamanǵa saı salalandyrýǵa, daralandyrýǵa atsalysqanyn basa aıtty.
«Birinshiden, Sáýkeń aqparat salasynyń úzdigi, sheber uıymdastyrýshy ǵana emes ıntelektýaldyq buqaralyq aqparat quraldarynyń baǵyn ashqan qalamger desek, artyq aıtqan bolmaıdy. Ekinshiden, Saýytbek Abdrahmanuly mádenıet yqpaldastyǵynyń iri mamany, kásibı zertteýshisi, aýdarmashylyǵy taǵy bar. Úshinshiden, Sáýkeń shyǵarmashylyǵyn sıpattaıtyn tapqyrlyq, sheshendik, oraıly ıýmor jastar úshin asa qajet qasıet dep bilemin. Tórtinshiden - Saýytbek Abdrahmanuly Qazaqstan halqy Assambleıasynyń beldi jáne jetekshi ókili, qazaq ulty men etnostardyń birlikte damýynyń jankúıeri. Besinshiden - Sáýkeń tamasha dárisshi, parasatty professor. Bilim alýshylar Abdrhamanov dárisin izdep júrip tyńdaıdy», - dedi ýnıversıtet basshysy.
Konferentsııa barysynda Saýytbek Abdrahmanovtyń «Eldik erligi» atty bes tomdyq pýblıtsıstıkalyq shyǵarmalarynyń tusaýkeseri ótti.