Membasqarý akademııasynda transformatsııalyq lıderlikke arnalǵan semınar ótti

ASTANA. QazAqparat - Qazaqstan Respýblıkasy Prezıdentiniń janyndaǵy Memlekettik basqarý akademııasynda «Qubylmaly álem jaǵdaıyndaǵy transformatsııalyq kóshbasshylyq» atty semınar-trenıng ótti. Oǵan Prezıdent Ákimshiliginiń ókilderi, ortalyq memlekettik organdardyń jaýapty hatshylary, oblystardyń, Astana, Almaty jáne Shymkent qalalary ákimderiniń apparat basshylary qatysty, dep habarlaıdy «QazAqparat» HAA.

Sharanyń ashylýynda Prezıdent Ákimshiliginiń basshysy Áset Isekeshev sóz sóılep, «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda Elbasy Nursultan Nazarbaev qazaqstandyqtardyń ál-aýqatyn arttyrýǵa baǵyttalǵan memlekettik apparatty qalyptastyrý aıasynda barlyq deńgeıdegi memlekettik organdar qyzmetiniń tıimdiligin túbegeıli arttyrý mindetin qoıǵanyn tilge tıek etti.

Á. Isekeshev ulttyń ál-aýqatyn jaqsarta otyryp, elimizdiń árbir azamatynyń ómirine oń yqpal tıgizetin qajetti ózgerister týraly óz kózqarasyn jetkizdi. «Joldaýdyń mazmuny men pishini, sondaı-aq onda aıtylǵan mindetter basqarýdyń jańa ádisterin qoldaný, is júzindik paıdasy bar reformalardy júrgizý qajettiligin aldymyzǵa qoıady. Sondyqtan memlekettik organdar jumystaǵy tıimdiligin arttyrýy tıis, ol jýyq arada reformalardyń barysyn monıtorıngileý men baǵalaýdyń jańa júıesimen baqylanatyn bolady», - dedi ol.

Prezıdent Ákimshiliginiń basshysy strategııalyq josparlaýdan, memlekettik basqarýǵa jobalyq kózqarasty engize otyryp, strategııalyq menedjmentke ótý qajettigin atap kórsetti. 

Shara aıasynda Respýblıkalyq bıýdjettiń atqarylýyn baqylaý jónindegi esep komıtetiniń tóraıymy N. Godýnova, Memlekettik basqarý akademııasynyń rektory F. Jaqypova, Memlekettik qyzmet salasyndaǵy óńirlik habtyń basqarýshy komıtetiniń tóraǵasy A. Baımenov, memlekettik organdardyń ókilderi, sondaı-aq Korn Ferry Hay Group (AQSh) dırektory T.Larıonov, Meinhardt Group kompanııasynyń (Sıngapýr) assotsıatıvti dırektory Kevın Chong sóz sóıledi.

Semınardyń ekinshi kúni qatysýshylar basqarýdyń zamanaýı Scrum jáne Agile ádisteri jaıyndaǵy pikirlerin bólisti.