Membaǵdarlamalar jobasyn Esep komıtetimen kelisý usynyldy

NUR-SULTAN. QazAqparat - Memlekettik baǵdarlamalardyń jobalaryn Esep komıtetimen kelisý kerek. Bul týraly Parlament Májilisiniń jalpy otyrysynda Respýblıkalyq bıýdjettiń atqarylýyn baqylaý jónindegi esep komıtetiniń tóraıymy Natalıa Godýnova aıtty, dep habarlaıdy QazAqparat tilshisi.

«Esep komıteti memlekettik qoldaý sharalary turaqtylyǵynda júzege asyrylatyn membaǵdarlamalardan ekonomıkalyq serpindi arttyrý úshin rezervterdi anyqtady», - dep toqtaldy N. Godýnova.

Onyń sózine qaraǵanda, 2018 jyly Esep komıteti baǵalaǵan membaǵdarlamalar boıynsha memlekettik qoldaýdy iske asyrý jaǵdaıy men tetikteriniń 40 paıyzy ózgeriske ushyrady.

«Memlekettik baǵdarlamalar jobalaryn ázirleý kezinde qarjylandyrý lımıtterin jetkizý, sondaı-aq baǵdarlamalar jobalaryn Esep komıtetimen kelisý - memlekettik resýrstardyń tıimsiz jumsalýyna eleýli túrde tosqaýyl qoıady dep sanaımyz», - dedi ol.

N. Godýnovanyń paıymynsha, bul kúsh-jigerdi eń mańyzdy basymdyqtarǵa jumsaýǵa, baǵdarlamalardyń tolyqtaı qarjylandyrylýyna yqpal etedi.

Onyń aıtýynsha, qazirgi kezde jalpyulttyq maqsattardyń 32 paıyzy memlekettik baǵdarlamalardyń deńgeıine deıin, 35 paıyzy ortalyq memlekettik organdardyń strategııalyq josparlaryna deıin, 68 paıyzy aýmaqtardy damytý baǵdarlamalaryna deıin kaskadtalmaǵan.