Mektepterdi attestatsııalaý kezinde qaýipsizdik deńgeıine basa mán berilmek

NUR-SULTAN. QazAqparat – Bilim berý uıymdaryn attestatsııalaý kezinde birinshi kezekte qaýipsizdik deńgeıi esepke alynatyn boldy, dep habarlaıdy QazAqparat tilshisi.

Bilim jáne ǵylym mınıstri Ashat Aımaǵambetov Úkimet janyndaǵy kámeletke tolmaǵandardyń isteri jáne olardyń quqyqtaryn qorǵaý jónindegi vedomstvoaralyq komıssııanyń otyrysynda sońǵy kezde álemde mektepterge shabýyldar jıilep ketkenine toqtaldy.

«Eger oqýshy nemese shartty túrde mektep túlegi óz mektebine qarýmen baratyn bolsa, bul tek bilimge ǵana emes, sonymen qatar tárbıe jumysyna, jalpy áleýmettený máselelerine, býllıngke, balalardyń mekteptegi ahýalyna nazar aýdarý qajet ekenin bildiredi. Al bala mektepte ózin baqytty sezinse, ol oǵan erteń qarý ustap kirmeıdi» - dedi Ashat Aımaǵambetov.

Ol, sondaı-aq, bilim berý uıymdaryn attestatsııalaý tártibine osy turǵydan ózgertýler enetinin eskertti.

«Barlyq bilim berý uıymdaryn akkredıtteý jáne attestattatsııalaý standarttaryna qaýipsizdik máselelerin birinshi kezekke engizdik. ıAǵnı, endi mektepti attestattatsııalaý nemese akkredıtteý kezinde birinshi kezekte balalardyń bilimin emes, uıym qyzmetkerleri men tálim alýshylardyń túrli jaǵdaılarda ózin qalaı ustaıytynyna, balalardyń qaýipsizdigi qanshalyqty saqtalǵanyna basa mán beriledi» - dep túsindirdi mınıstr.