Mektepterde jańa jyldyq merekege aqsha jınaýǵa tyıym salynǵan – Mınıstr

<p>ASTANA. KAZINFORM &ndash; Mektepterde jańa jyldyq is-sharalarǵa aqsha jınaýǵa jol berilmeıdi. Bul týraly Oqý-aǵartý mınıstri Ǵanı Beısembaev Úkimettegi brıfıngte aıtty.</p>

– Buryn da aıtqanymyzdaı, mektepterde eshqandaı aqsha jınaý bolmaýy kerek. Osy jáne basqa da is-sharalar boıynsha únemi mınıstrlik buıryǵymen tyıym salynǵanyn aıtyp kelemin. Sondyqtan mektepterde eshqandaı aqsha jınaýǵa jol berilmeıdi. Bul jańa jyldyq shyrshalarǵa, merekelik keshterge de qatysty. Kez kelgen is-sharany aqsha jınamaı-aq ótkizýge bolady. Ásirese, qazir barlyq is-shara «Birtutas tárbıe» baǵdarlamasy aıasynda josparlanǵan, – dedi Beısembaev.

Mınıstr kez kelgen is-shara kóńil kóterýge emes, balalardy tárbıeleýge baǵyttalýy kerek ekenin basa aıtty. Sonymen birge, Ǵ.Beısembaev muǵalimderge syılyq berý máselesine de toqtaldy.

– Syılyqtarǵa da qatysty «Gúl syılaýǵa bola ma?» degen suraqqa jaýap bergenmin. Iá, ruqsat etilgen shekte bolady. Meniń bilýimshe, muǵalimder eshqandaı syılyq kútpeıdi. Biz balalardy eshqandaı materıaldyq marapat kútpeýge úıretip, tárbıelep jatyrmyz, – dep atap ótti Oqý-aǵartý mınıstri.

Aıta keteıik, aýyldyq aýmaqtardy damytý tujyrymdamasy sheńberinde 2027 jylǵa deıin 180-ge jýyq mektep salý josparlanǵan. Bıyl «Jaıly mektep» ulttyq jobasyn qosa alǵanda, aýyldarda 42 mektep paıdalanýǵa berildi.

Elimizdegi 8 myńǵa jýyq mekteptiń 67% nemese 5247-si – aýyl mektebi. Oqýshylardyń 40% aýyl mektebinde bilim alady.

Sondaı-aq, elimizde úsh aýysymdy, apatty mektepterdiń basym bóligi aýyldarda baıqalyp otyr.