Mektepterde ózin-ózi basqarý júıesin engizemiz – Ashat Aımaǵambetov
«Ulttyq keńes otyrystarynda qaralyp usynylǵan ıdeıalar men bastamalardyń 43 paıyzy bilim berý salasyna qatysty. Bul degenimiz bilim qashanda basty nazarda degen sóz. Bilim salasyndaǵy búgingi ózgeristerge kelsem, aldymen basqarý. Aıtar bolsam, búginde joǵary oqý oryndaryna korporatıvtik basqarý júıesin engizdik. Buryn ýnıversıtet rektorlary barlyq mańyzdy sheshimderdi óz betterimen qabyldasa, endi dırektorlar keńesi bar. Orta bilim berýge kelsek, endigi ýaqytta muǵalimder jumysqa baıqaý arqyly qabyldanady. Sonymen qatar biz qarjylandyrý salasynda da aıtarlyqtaı reforma júrgizip jatyrmyz. Endigi ýaqytta bilim berý uıymdaryna qarjy jan basyna eseptelip bólinedi. Bul naqtylyq. Demek JOO-da 1 myń stýdent bar ma sonsha janǵa eseptelinip qarajat bólinedi», - dedi A. Aımaǵambetov elordada ótken Prezıdenttik jastar kadrlyq rezervteriniń forýmynda.
Odan bólek, mınıstr bilim berý salasyndaǵy taǵy bir jańashyldyq mektepke deıingi tárbıe jáne bilim berý uıymdaryn ata-ananyń ózi tańdaı alatynyn aıtyp ótti.
«Sońǵy 2 jylda elimizde jeke mektepterdiń sany 2 esege artty. Bul óz kezeginde memlekettik bıýdjetke túsetin salmaqty azaıtady. Qazirgi ýaqytta JOO-ǵa ózin-ózin basqarý júıesi engizildi, bul tájirıbe kolledjderge de engizilip jatyr. Aldaǵy ýaqytta ózin-ózi basqarý júıesin mektepterge engizetin bolamyz. Sebebi pandemııa bilim berý mekemeleri basshylarynyń óz betinshe sheshim qabyldap, tıimdi jumys isteýdiń mańyzdylyǵyn kórsetti. Tsıfrlandyrýǵa kelsek, búginde mekteptegi pándik olımpıadalar men UBT elektrondyq formatta ótip jatyr. Bul ýaqyt pen qarjyny áldeqaıda únemdeıdi», - deıdi ol.