Mektepterde býllıngke qarsy biryńǵaı baǵdarlama engiziledi

ASTANA. QazAqparat – Elimizde bilim berý uıymdaryndaǵy býllıngke qarsy biryńǵaı baǵdarlama ázirlenip jatyr. Bul týraly Oqý-aǵartý vıtse-mınıstri Edil Ospan ortalyq kommýnıkatsııalar qyzmetinde ótken dóńgelek ústelde aıtty, dep habarlaıdy QazAqparat tilshisi.

«Bizge bilim berý uıymdary men onyń syrtyndaǵy býllıng pen qýdalaý faktileri týraly shaǵymdar túsip jatady. Onyń ishinde áleýmettik jeli arqyly da derekter tirkelýde. Osyǵan baılanysty búkil elge arnalǵan biryńǵaı býllıngke qarsy baǵdarlama ázirleýdi bastadyq. Ol baǵdarlama eldegi búkil bilim berý uıymdarynda qoldanylatyn bolady.

Baǵdarlama aıasynda balalarmen býllıngtiń ne ekeni, onyń zardaby týraly, jaman úrdis ekeni týraly áńgime júrgiziledi. Balalar men muǵalimder bir-birin túsinýdi, problemany birge ári beıbit jolmen sheshýdi úırenedi», - dedi Edil Ospan.

Onyń aıtýynsha, balalardyń bul máselede jalǵyz emes ekenin túsinýi mańyzdy.

«Mektepterde balalar problemaǵa tap bolsa, eresektermen sóılesýine arnalǵan oryndar qurylady. Osylaısha bala, ata-ana, muǵalim úshtigi birge jumys istep, mektepti qaýipsiz ortaǵa aınaldyrýǵa kúsh salady.

Baǵdarlamaǵa tárbıelik komponentter de qosylady. Synyp saǵattary men ata-analardyń jınalystarynda bul másele kóp talqylanady. Býllıngke qarsy baǵdarlamanyń tıimdiligine onlaın modýl arqyly monıtorıng júrgiziledi jáne aı saıyn bilim berý uıymdaryndaǵy býllıng derekteri jınaqtalyp otyrady», - dedi vıtse-mınıstr.