Mektepterde aı saıyn balalardyń qaýipsiz minez-qulqyn qalyptastyrýǵa baǵyttalǵan sabaqtar ótedi - BǴM
Brıfıng qylmystyq qastandyqtan bala quqyǵyn qorǵaý sharalaryna arnalǵan bolatyn.
«Jańa oqý jyly bastalmaı turyp, mınıstrlik tarapynan barlyq jergilikti atqarýshy organdarǵa nuqsaýlyq hat joldandy. Onda birinshiden, bilim berý mekemelerin mektep psıhologtarymen, áleýmettik pedagogtarmen tolyq qamtamasyz etý máselesi qoıylyp otyr. Ekinshiden, jańa oqý jylynan bastap árbir aıdyń sońǵy aptasynda synyp saǵattary sheńberinde balalardyń qaýipsiz minez-qulqyn qalyptastyrýǵa baǵyttalǵan profılaktıkalyq sabaqtar ótkizý mindetteledi», - dedi mınıstrlik sarapshysy.
Onyń aıtýynsha, Bilim jáne ǵylym mınıstrligi balalarǵa qatysty nápsiqumarlyq, zorlyq faktileriniń kóbeıýine baılanysty qylmystyq zań buzýshylyqtardyń aldyn alý jónindegi 2015-2017 jyldarǵa arnalǵan is-qımyl jospary bekitilgen. Sonymen qatar, bilim berý mekemelerindegi oqýshylar men tárbıelenýshiler arasyndaǵy quqyq buzýshylyqtarynyń aldyn alý, dene men psıhologııalyq saýlyqty nyǵaıtý, halyqaralyq tájrıbelerge sáıkes, elimizdegi zańnamalardy jetildirý kózdeledi.
Al Іshki ister mınıstrliginiń ókili Áset Ospanovtyń sózine qaraǵanda, aldaǵy ýaqytta balalardy qylmystan qorǵaýdyń profılaktıkalyq sharalaryn júzege asyrý josparlanbaq. Sonyń biri - psıhologtardy qatystyra otyryp, mektep oqýshylarynyń arasynda psıhologııalyq test alý.