Mektepter 84% lıtsenzııalanǵan kúzetpen qamtylady

ASTANA. QazAqparat – Oqýshylardyń qaýipsizdigin saqtaý maqsatynda el mektepterinde ruqsaty bar kúzetpen qamtý sharalary qolǵa alynyp jatyr. Keıbir óńirde máselege basa nazar aýdarý qajet. Bul týraly Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Bilim berý uıymdarynda balalardyń qaýipsizdigin qamtamasyz etý máselesi boıynsha kelesi jumystar júrgizildi. Aldymen mektepterdi ishki ister organdarynyń jedel basqarý ortalyqtaryna qosý. Ulttyq bilim berý derekter bazasyna sáıkes bul kórsetkish 12 tamyzda 83% boldy. Eger jyl basynda 1 673 mektep qosylǵan bolsa, qazir bul kórsetkish 3 103 mektepke artyp otyr. Alaıda Almaty, Atyraý jáne Qaraǵandy oblystarynyń ákimdikteri bul jumysty baıaý júrgizip jatyr. Sondyqtan atalǵan óńirler ózińizdiń tapsyrmańyzǵa sáıkes jedel basqarý ortalyqtaryna qosylý boıynsha jumysty 25 tamyzǵa deıin aıaqtaýy qajet», - dedi Ǵanı Beısembaev Úkimet otyrysynda.

Sondaı-aq mınıstr mektepterdegi kúzet máselesin qozǵady.

«Lıtsenzııalanǵan kúzet agenttikterimen jasalǵan kelisimsharttar negizinde jumys júrip jatyr. Qazir bul baǵytta 84% jumys júrgizildi. Degenmen Túrkistan jáne Almaty oblystarynyń bul baǵyttaǵy jumysy baıaý ekenin atap ótkim keledi. Sonymen qatar dabyl túımelerin mektepterdiń 89%-y ornatty. Eger jyl basynda dabyl túımeleri bar 1 789 mektep bolsa, búgingi kúni 1,9 ese (3 327 mektep) óskenin atap ótkim keledi.

Onyń aıtýynsha, Túrkistan oblysy, Aqtóbe jáne BQO ákimdikteri atalǵan máseleni júıeli túrde qatań baqylaýda ustaýy qajet.