Mekteptegi býllıng oqýshynyń bilim alý qabileti men yntasyna keri yqpal etedi

NUR-SULTAN. QazAqparat – Bilim berý uıymdaryndaǵy býllıng oqýshynyń bilim alý qabileti men yntasyna keri yqpal etedi. Bul týraly QR Bilim jáne ǵylym vıtse-mınıstri birinshi Bıbigúl Asylova aıtty, dep habarlaıdy QazAqparat tilshisi.

«Býllıng, kıberbýllıng, mobbıng túsinikteriniń ortaq negizi bar – bul qýdalaý. Bilim berý uıymdaryndaǵy qýdalaý oqýshynyń bilim alý qabileti men yntasyna, sabaqqa qatysýyna teris yqpal etetin, olardyń akademııalyq úlgerimin aıtarlyqtaı tómendetetin keńinen taralǵan problema bolyp otyr», - dedi Bıbigúl Asylova Ortalyq kommýnıkatsııalar qyzmetindegi baspasóz máslıhaty barysynda.

Onyń atap ótýinshe, qýdalaý saldarynan balalar oqý ornyn merziminen buryn tastap ketedi nemese basqa mektepke aýysýǵa májbúr. Sonyń saldarynan olar ózderiniń tegin bilim alý quqyqtaryn tolyq kólemde júzege asyrý múmkindiginen aıyrylady.

«Býllıng balalarda qorqynysh jáne qaýipsizdiktiń joqtyǵyn sezdiredi. Munyń ózi tálim-tárbıe berý mindetterine qarama-qaıshy jáne qaýipsiz ári qolaıly ortada bilim alý quqyqtarynan aıyrady», - dedi QR Bilim jáne ǵylym vıtse-mınıstri.