Mekteptegi beınekameralar polıtsııanyń Jedel basqarý ortalyqtaryna jalǵanady

NUR-SULTAN. QazAqparat – Bilim jáne ǵylym mınıstri Ashat Aımaǵambetov qala mektepteriniń beınebaqylaý kameralaryn Polıtsııa departamentteriniń janyndaǵy Jedel basqarý ortalyqtaryna jalǵaýdy tapsyrdy, dep habarlaıdy QazAqparat tilshisi.

«Barlyq qala mektepterindegi beınebaqylaý kameralary Polıtsııa departamentteriniń janyndaǵy Jedel basqarý ortalyqtaryna jalǵanýy tıis. Bul is ınternettiń sapaly bolýyn, qosymsha kameralar ornatýdy qajet etedi. Biraq basqa amalymyz joq», - dedi Ashat Aımaǵambetov.

Vedomstvo basshysy Іshki ister mınıstrligimen birlesken buıryq boıynsha barlyq beınebaqylaý júıelerin sáıkestendirý qajettigin atap ótti.

«Kórip otyrsyzdar, mektepterge ornatylǵan kameralardyń bir bóligi talapqa saı emes ekeni aıtyldy. Ásirese ornatqan jerdi durys tańdamaý, jazbany saqtaý merziminiń qysqalyǵy, vıdeonyń sapasyzdyǵy sııaqty problemalar jıi kezdesedi. Atalǵan kemshiliktiń bárin joıý qajet. Bilim oshaqtary barynsha arnaıy mamandandyrylǵan kúzetpen qamtamasyz etilýi kerek. Áýeli úlken mektepterden bastap, keıin shaǵyn jıyntyqty mektepterge kóshý qajet», - dedi Ashat Aımaǵambetov.