Mektepte syzýdy úırenbegen túlekter oqýǵa túserde qınalyp jatyr - akademık

NUR-SULTAN. QazAqparat – T. Basenov atyndaǵy Sáýlet jáne qurylys ınstıtýtynyń dırektory, sáýlet doktory, akademık Bolat Quspanǵalıev mektepte syzý pániniń oqytylmaýyn qatelik retinde baǵalap otyr, dep habarlaıdy QazAqparat tilshisi.

«Bilim salasyndaǵy mınıstrlikke birneshe ret jazdyq. Ókinishke qaraı, orta mektepten syzý pánin alyp tastaǵan. Al, Prezıdentimiz tehnıkalyq bilim berý isin kóterý kerektigin aıtyp júr. Biz ol bastamamen túgel kelisemiz. Biraq, tehnıkalyq bilimniń negizi, daıyndyq bazasy - osy syzý páni ǵoı. Ony nege alyp tastady? Osy jeri qyzyq», - dedi akademık ortalyq kommýnıkatsııalar qyzmetinde ótken dóńgelek ústelde.

Sondaı-aq, ol mektepte syzý pánin oqymaǵan túlekter keıin qınalyp jatqanyn aıtty.

«Mektepte syzý páni oqytylmaǵanymen, oqýǵa qabyldaıtyn emtıhannyń shyǵarmashylyq bóliminde syzý páni áli bar. Tańǵalasyń! Bizdiń mamandyqta osyndaı paradokstar, sáıkessizdikter barshylyq. Osyndaı qaıshy tustardy joısaq eken», - dedi Bolat Quspanǵalıev.

Aıta ketsek, buǵan deıin Nur-Sultan qalasynyń sáýlettik qurylysyn josparlaý erejesi bekitilgen bolatyn.