Mektepte oqýshylarǵa mantýdyń ornyna BTsJ salý oqıǵasy: Aqtóbege arnaıy komıssııa keldi

AQTÓBE. QazAqparat - Elimizdiń jetekshi mamandary mantý synamasynyń ornyna vaktsına alǵan aqtóbelik oqýshylardy tekserip jatyr. Aqtóbege QR Densaýlyq saqtaý mınıstrliginiń arnaıy komıssııasy keldi, dep habarlaıdy QazAqparat tilshisi.

Búgin Aqtóbege QR Densaýlyq saqtaý mınıstrliginiń arnaıy komıssııasy kelip, №74 mekteptiń 1-synyp oqýshylarynyń ata-analarymen kezdesti. Delegatsııany densaýlyq saqtaý vıtse-mınıstri – bas memlekettik sanıtarlyq dáriger Aıjan Esmaǵambetova basqarady.

«Jaǵdaı mınıstrdiń jeke baqylaýynda. Qyzmettik tergeý bastaldy, komıssııa quryldy, jospardan tys tekserýler de júrgizilip jatyr. Epıdemıologııalyq tekserýdiń qorytyndysy boıynsha jáne saraptama nátıjesiniń negizinde oqıǵaǵa baǵa berilip, medıtsına qyzmetkerlerin jaýapqa tartý týraly sheshim qabyldanady. Barlyq bala jiti baqylaýda bolady», - dedi Aıjan Esmaǵambetova.

Kezdesý barysynda ata-analar mamandarǵa suraqtaryn qoıyp, jaýap aldy. Al mantý synamasynyń ornyna BTsJ vaktsınasyn alǵan balalar mektepte sabaqqa qatysyp, sonymen qatar medıtsınalyq tekserýden ótedi. Búgin olardy Aqtóbege kelgen respýblıkalyq ulttyq ftızıopýlmonologııalyq ortalyqtyń, pedıatrııa jáne balalar hırýrgııasy ǵylymı ortalyǵynyń jetekshi mamandary tekserdi.

Aqtóbe oblysy ákimi baspasóz qyzmetiniń habarlaýynsha, jaǵdaı Aqtóbe oblysynyń ákimi Eraly Toǵjanovtyń erekshe baqylaýynda. Aımaq basshysynyń tapsyrmasymen búgin mektep memlekettik emhananyń qyzmetine berildi. Balalardyń densaýlyǵyn turaqty baqylaý maqsatynda qaladaǵy úzdik dárigerlerdiń arasynan shyqqan pedıatrlar eki aı boıy bilim oshaǵynda kezekshilikte bolady.

Eske salsaq, osy derekke qatysty qylmystyq is qozǵaldy. Tergeý júrip jatyr.