Mektepte hıdjab kııýge ruqsat joq - M. Ázilhanov

ASTANA. QazAqparat - Mektepte hıdjab kııýge ruqsat joq. Búgin Májilistiń Halyqaralyq ister, qorǵanys jáne qaýipsizdik komıteti men Áleýmettik-mádenı damý komıtetiniń kóshpeli otyrysynda Mádenıet jáne sport vıtse-mınıstri Marat Ázilhanov osylaı málimdedi.

Eske salaıyq, otyrysta dinı toleranttylyq pen konfessııaaralyq kelisimdi nyǵaıtý máseleleri talqylanǵan bolatyn.

Otyrys barysynda depýtattar saýalyna jaýap bergen vıtse-mınıstr, qoǵamda keńinen talqylanyp júrgen hıdjab taqyryby óte názik másele ekenin atap ótti. «Sonyń ishinde, túıini mektepte dinı oramal taǵýǵa bola ma, bolmaı ma degenge kelip tireledi. Al, qalǵan jerlerde hıdjab - ár adamnyń óz erkindegi sharýa. Sonymen qatar, mektepterde Bilim jáne ǵylym mınıstrligimen birge atqaryp otyrǵan jumysymyzdyń barlyǵy jarǵy arqyly júzege asady. Sondyqtan da, «Bilim týraly» zań men arnaıy jarǵyda kórsetilgenindeı «Mektepte dinı atrıbýttar qoldanylmaıdy» degen qaǵıda bar», - dedi M. Ázilhanov. Onyń sózine qaraǵanda, qazir elimizdiń mektepterinde osy jarǵynyń qaǵıdaty engizilip jatyr. Sonymen qatar, túsindirý jumystary da birlese atqarylady. Budan bólek, vıtse-mınıstr jýyrda Aqsaı aýdany sotynyń qaýlysymen 1-synypta oqıtyn qyzyna oramal taǵyp jibergen ákeniń áreketi durys emes dep tanylǵanyn jetkizdi.

«Zaıyrly memlekettiń mektebinde dinı atrıbýttar qoldanýǵa jol bere almaımyz»,-dedi vıtse-mınıstr.