Mektepke jol: Jetisý oblysynda 15 myńnan asa balaǵa kómek kórsetiledi

TALDYQORǴAN. QazAqparat – Bilim basqarmasynyń málimeti boıynsha «Mektepke jol» aktsııasy aıasynda 15 myńnan asa balaǵa kómek kórsetý josparlanyp otyr, dep habarlaıdy QazAqparat Jetisý oblysy ákiminiń baspasóz qyzmetine silteme jasap.

Aktsııa aıasynda 1-synypqa qabyldanǵan oqýshylar, sonymen qatar áleýmettik kómek alýǵa tıisti, qujat jınaýǵa múmkindigi joq, turmysy qıyn otbasy balalary jáne jazǵy mezgilde respýblıkannyń basqa óńirlerinen oblysqa kóship kelgen áleýmettik kómek alýdy qajet etetin balalar qamtylady.

«Mektepke jol» aktsııasyn uıymdastyrýshy aýdandyq, qalalyq bilim bólimderi, mektepter óz qalasy men aýdandarynyń barlyq azamattaryna, bıznesmenderge, kásipkerlerge, metsenattarǵa aktsııaǵa qosylý jáne ómirlik qıyn jaǵdaıda otbasylar men balalarǵa kómek kórsetýge óz úlesin qosý usynysymen júgindi. Oblysta birneshe jyl qatarynan óz bastamasymen kómek kórsetetin demeýshiler de bar.

Aktsııanyń maqsaty — áleýmettik kategorııadaǵy balalarǵa oqý jylynyń bastalýyna daıyndyq kezinde materıaldyq qoldaý kórsetý, balalardyń mektepke kelmeýiniń aldyn alý. Bul baǵytta ishki ister organdarymen birlesip, balalardy tolyq oqýmen qamtý maqsatynda reıdter uıymdastyrylady.

Sonymen qatar, mektep oqýshylaryn mektep formasymen jalpyǵa mindetti bilim berý qorynan qamtamasyz etý jumysy da júrgizilip jatyr.

Oblystaǵy áleýmettik kómek alatyn toptaǵy otbasylardan 21 785 balaǵa mektep formasy jáne mektepke qajetti qural-jabdyqtar alýǵa balalardyń ata-analarynyń shottaryna qarajat aýdarý jumysy júrgiziledi. Búgingi kúni oblys boıynsha 12 118 oqýshynyń ata-analarynyń kartalyq shottaryna 491,6 mln teńge (55,6%) qarajat aýdaryldy. Bul baǵyttaǵy jumys 10 tamyzǵa deıin aıaqtalady.