«Mektepke jol»: Pavlodar oblysynda myńnan astam bala kómek aldy
Oblystyq bilim basqarmasynyń málimdeýinshe, jyl saıyn halyqtyń áleýmettik osal toptaryna balalardy mektepke daıyndaýda kómek kórsetý maqsatynda «Mektepke jol» respýblıkalyq aktsııasy ótkiziledi.
«Joba aıasynda jurtshylyqty, kásiporyndardy, shaǵyn jáne orta bıznes ókilderin osy aktsııaǵa tartý boıynsha jumystar júrgiziledi. Bilim bólimi aktsııany ótkizý boıynsha is-sharalar josparyn jasap, ákimdik, «Amanat» partııasy, qalalyq jáne oblystyq máslıhat bólimderine, qala kásiporyndaryna ótinish-hattar joldady», - delingen habarlamada.
Qazirgi tańda kómekke muqtaj balalardyń derekter bankin qurý boıynsha jumystar áli jalǵasida. Árbir orta bilim berý uıymynda tizimder qalyptastyryldy. Búgingi tańda 1-11 synyptar arasynan kómekke muqtaj 3045 oqýshysynyń tizimi jasaldy.
Bilim bóliminde balalardy mektepke daıyndaý máseleleri boıynsha ata-analar habarlasa alatyn «Jedel jeli» telefondary (tel.30-14-97, 30-14-91) qyzme etýde.
«Jalpyǵa birdeı bilim berý qorynan osy sanattaǵy balalarǵa mektep formasy men keńse taýarlaryn satyp alýǵa 140 mln.teńgeden astam qarajat bólindi. Bir bilim alýshyǵa 47 296 teńgege tıesili, olar balalardyń zańdy ókilderiniń jeke shottaryna aýdarylady. Búginde memleketten 49 973,0 myń teńge somaǵa 1057 bala qarjylaı kómek aldy», - dep tolyqtyrdy basqarma.
Aıta ketelik, bilim bólimi qalanyń kásipkerlik bólimimen birlesip aǵymdaǵy jyldyń 19 tamyzynda mektep jármeńkesin ótkizýdi josparlap otyr. Onda qala kásipkerleri tómendetilgen baǵamen taýarlar (mektep formasy, keńse taýarlary) usynatyn bolady.
Qazir «Mektepke jol» aktsııasy barysynda 594 000 teńge somasyna 54 oqýshyǵa kıim jáne keńse taýarlary túrinde demeýshilik kómek kórsetildi. Demeýshiler «Kaspıı banki», «Syzdyqov» JK, «Archakov» JK, sondaı-aq ata-analar men muǵalimder.
Atap óterligi, «Birinshi ret – birinshi synypqa» aktsııasy aıasynda «Halyq banki» AQ 50 bolashaq birinshi synyp oqýshylaryna keńse taýarlary bar mektep rıýkzaktaryn tabystaýdy josparlap otyr.
Bul baǵyttaǵy jumystar áli de jalǵasýda.